A alcaldesa, Inés Rey, puxo en valor hoxe os avances que están a experimentar as obras de construción da conexión ferroviaria co porto exterior de Punta Langosteira, que hoxe chegaron a paso clave: o cale do túnel 1 e a última voadura da escavación, na boca situada no lado de Vío.

Rey, que acompañou o ministro de Transportes e Mobilidade Sostible, Óscar Puente, na posta en marcha desta intervención, subliñou a importancia da colaboración interadministrativa "para que iniciativas do calado de Punta Langosteira sexan unha realidade", e apuntou ao "diálogo construtivo" como o camiño que cómpre seguir para dar novos pasos en cuestións fundamentais para A Coruña e a súa área metropolitana en termos de melloras da mobilidade, transporte e loxística.

Neste sentido, a rexedora destacou que esta filosofía foi a que permitiu que xa estean en marcha iniciativas como as obras de ampliación e remodelación de Alfonso Molina, o avance dos traballos de construción da nova estación intermodal, o asentamento das bases para renovar a fachada marítima da Coruña ou rubricar o saneamento da ría do Burgo, entre outras.

"Todas estas cuestións son fundamentais para modernizar a cidade, interconectala adecuadamente cos concellos próximos e propiciar unha dinamización económica que, por exemplo, xa é palpable en Punta Langosteira coa chegada de empresas e o pulo a sectores de futuro como as enerxías renovables", incidiu Rey.

O proxecto da Cuarta Rolda, en fase de redacción

No acto desta mañá en Vío, a alcaldesa tamén agradeceu a disposición e implicación do Ministerio de Transportes e Mobilidade Sostible para avanzar na consecución do proxecto da Cuarta Rolda, actualmente en fase de redacción.

Tal e como se informou a mediados de decembro, na visita do director xeral de Carreteras del Estado, Juan Pedro Fernández Palomino, na redacción xa se inclúe que o trazado final da Cuarta Rolda atenda as necesidades futuras da cidade en termos de transporte, loxística e mobilidade, incorporando a conectividade cos polígonos empresariais da Coruña, recollendo as achegas de Agrela, Pocomaco e Vío para contribuír ao seu desenvolvemento.