A alcaldesa, Inés Rey, estivo hoxe no Coliseum asistinto á 38ª edición do Trofeo Miguelito, que congregou a máis de 3.000 xóvenes nunha das competicións máis importantes do judo base en do país e todo un clásico do calendario deportivo coruñés. En total, acudiron máis de 15.000 persoas ao longo da xornada entre participantes, equipos técnicos e público. Ademais, a organización contou con máis de 100 persoas voluntarias que fixeron posible o evento. Rey estivo acompañada pola concelleira de Infraestruturas e Mobilidade, Noemí Díaz. 

"Como alcaldesa, é un orgullo que competicións coma esta innoven ano tras ano, sempre buscando o mellor para as persoas que participan nela. Éncheme de honra que o noso Concello sexa o municipio galego que máis apoia ao judo", apuntou Inés Rey durante a súa visita.

O Miguelito é xa unha referencia consolidada dentro do deporte base e destaca tamén polo seu carácter inclusivo, cunha competición adaptada para judokas con diversidade funcional e un proxecto que ten como obxectivo a loita contra o acoso escolar a través dunha campaña que busca trasladar os valores do judo á sociedade en xeral.

O evento leva o nome de Miguel Ángel López Pérez, judoka coruñés falecido con 19 anos, e busca ser un camiño que axunte na mocidade a práctica do deporte e a transmisión de valores universais como o respecto e a integración, un concepto innovador que fixo que a competición fose recoñecida pola Unión Europea de Judo como un referente da promoción deste deporte no continente.