O Concello da Coruña organiza unha nova edición das Xornadas Europeas de Arqueoloxía, que se desenvolverán os días 13 e 14 de xuño no Castelo de San Antón e no Castro de Elviña, cunha programación dirixida a todos os públicos que inclúe visitas guiadas e actividades participativas. 

As Xornadas, impulsadas a nivel europeo para divulgar o patrimonio arqueolóxico, contarán na cidade cun programa que combina actividades didácticas e experiencias prácticas, permitindo á cidadanía descubrir o pasado da Coruña e o labor das e dos profesionais da arqueoloxía. Entre as propostas destacan as visitas guiadas ao Museo Arqueolóxico e Histórico do Castelo de San Antón, que terán lugar o sábado 13 e o domingo 14 ás 12.00 horas, cun percorrido polas distintas seccións do museo. 

No caso do Castro de Elviña, tamén haberá unha visita guiada o domingo 14 ás 12.00 horas, na que as persoas participantes poderán coñecer o xacemento e os avances das últimas campañas arqueolóxicas. 

Todas as visitas contan con prazas limitadas e requiren inscrición previa, que abrirá ao público o martes 9 ás 10.00 horas a través do teléfono 981 18 98 50, no caso das visitas guiadas, e nas ligazóns correspondentes de cada actividade.

Obradoiros infantís para aprender xogando

A programación inclúe tamén diversos talleres infantís dirixidos a nenas e nenos de entre 6 e 12 anos, nos que se achegarán á arqueoloxía dunha maneira lúdica e participativa. 

No Castelo de San Antón desenvolveranse propostas como "Pensar coas mans", centrado na cerámica prehistórica, ou "Rock Art", no que a rapazada poderá descubrir o significado dos petróglifos e crear as súas propias reproducións. 

Pola súa banda, no Castro de Elviña organizaranse actividades como "Arqueoloxía en acción!", cunha escavación simulada para coñecer o traballo de campo, e "Rastrexando Elviña", un percorrido dinámico con probas que permitirán descubrir os segredos do xacemento. 

Actividades para público adulto

Ademais, o sábado 13 celebrarase no Castro de Elviña un taller de experimentación arqueolóxica para persoas adultas, no que se dará a coñecer o proceso completo dunha intervención arqueolóxica, desde a prospección ata o rexistro dos materiais. 

Inscricións a partir do 9 de xuño

Todas as actividades son de balde, mais requiren inscrición previa ata completar a capacidade. O prazo abrirase o martes 9 de xuño ás 10.00 horas, podendo formalizarse a través dos enlaces habilitados para cada actividade ou do teléfono habilitado ao efecto. 

O Goberno de Inés Rey anima á cidadanía a participar nesta iniciativa, que "contribúe a visibilizar e poñer en valor o noso patrimonio histórico desde unha perspectiva aberta, didáctica e interxeracional", en liña co obxectivo de achegar a arqueoloxía ao conxunto da sociedade, tal e como xa se destacou en edicións anteriores.