O Concello da Coruña pon en marcha unha nova edición de Bebescena Outono, o ciclo de artes escénicas destinado á primeira infancia que se desenvolverá no Centro Sociocultural Ágora entre os meses de setembro e decembro. O programa contará con cinco espectáculos de compañías de referencia que combinarán danza contemporánea, teatro visual, música, narración e monicreques para achegar as artes escénicas aos máis pequenos da casa. Todas as funcións terán lugar en sesión dobre, ás 11.30 e ás 13.00 horas, nun formato especialmente adaptado ás necesidades do público infantil e das súas familias.

O concelleiro de Cultura e Turismo, Gonzalo Castro, destacou que "Bebescena é unha das citas máis consolidadas da programación familiar municipal e unha ferramenta fundamental para garantir o acceso á cultura desde as primeiras etapas da vida". O edil sinalou ademais que "o Goberno de Inés Rey continúa apostando por unha oferta cultural diversa, de calidade e pensada para todos os públicos, incluídas as nenas e nenos máis pequenos, que tamén teñen dereito a vivir experiencias culturais adaptadas á súa idade".

As propostas desta edición abranguen diferentes linguaxes artísticas e están deseñadas para estimular a curiosidade, a imaxinación e a sensibilidade das crianzas a través do movemento, a música, a narración e o xogo escénico. Como vén sendo habitual no ciclo, os espectáculos desenvolveranse nunha disposición que favorece a proximidade entre artistas e público, creando unha experiencia cómoda, participativa e especialmente atractiva para a primeira infancia.

A programación comezará o 27 de setembro con 'Únicos', da compañía Date Danza, un espectáculo de danza contemporánea para público a partir dos 18 meses que invita a reflexionar sobre a identidade e a diversidade a través do movemento. O 18 de outubro chegará 'La Selva', de Teloncillo, unha proposta de teatro xestual e musical para bebés e crianzas de entre 6 meses e 5 anos que propón unha viaxe chea de animais, música e humor. A seguinte cita será o 8 de novembro con 'Canta, Buguina, canta!', creación de Marta Ortiz destinada a bebés de entre 0 e 6 meses, na que a poesía, as cancións, os contos e os estímulos visuais e sonoros se converten nunha primeira achega á literatura e á creación artística. Xa o 29 de novembro, o público poderá gozar de 'Lumiero', de La Menuda, unha proposta de teatro visual, musical e xestual que convida a descubrir o universo da luz e das sombras a través dun personaxe soñador e dun coidado universo escénico. O ciclo pecharase o 13 de decembro con 'Dedín, dedín, dedal malasombra', un espectáculo de monicreques e música en directo pensado para crianzas de entre 1 e 6 anos, no que os xogos, as cantigas, os contos e a participación do público son os grandes protagonistas.

As entradas xa están á venda a través de Ataquilla e dos puntos habituais de venda. O prezo xeral é de 6 euros, mentres que os menores de 3 anos, as persoas con discapacidade acreditada e un acompañante poderán acceder mediante entrada reducida de 2 euros. Tamén está dispoñible un abono de tres funcións por 15 euros. Con esta nova edición de Bebescena, o Concello reafirma a súa aposta por unha programación cultural estable para as familias e pola creación de espazos de encontro arredor das artes escénicas desde os primeiros anos de vida.