A xira 'Hogar' de IZAL anuncia a súa parada na Coruña o próximo 14 de maio no Coliseum. A banda volve subir aos escenarios para presentar en directo o seu último traballo discográfico 'Hogar'. A cita súmase ás outras oito cidades españolas que xa foran anunciadas.

O recinto municipal, xestionado polo IMCE, amplía deste xeito a súa oferta musical para esta tempada 2022. As entradas para o concerto de IZAL sairán á venda este mesmo xoves, 17 de febreiro. Estarán dispoñibles a partir das 12.00 horas nos puntos habituais de venda en liña e no despacho de billetes do quiosco da praza de Ourense.

O disco 'Hogar' está producido por IZAL xunto a Brett Shaw (Foals, Florence & The Machine ou Lady Gaga) e Sancho Gómez-Escolar. Trátase dun dos traballos máis íntimos e persoais da banda.

IZAL súmanse a unha ampla listaxe de músicos que pasarán este 2022 polo Coliseum da Coruña. O recinto municipal xestionado polo IMCE recupera desta maneira unha extensa programación que inclúe os mellores artistas nacionais de actualidades e actuacións internacionais de gran calidade. Cabe destacar, entre outros, a actuación de C. Tangana o 26 de febreiro, nunha das poucas datas do artista en España. Tamén regresarán ao recinto grandes nomes da música nacional como Fito & Fitipaldis (18 e 19 de marzo), Leiva (30 de abril, Raphael (11 de xuño), Joan Manuel Serrat (8 de xullo), Malú (17 de setembro) ou Melendi (22 de outubro). Completan a oferta Van Morrison (31 de marzo), Il Divo (15 de xullo), Camilo (21 de xullo) e o Resurrection Day (8 de outubro).