O Concello da Coruña abriu a convocatoria para participar no programa Antenas de Información Xuvenil (AIX) durante o curso 2026-2027, unha iniciativa da Concellaría de Benestar Social, Participación e Igualdade que busca achegar directamente aos centros educativos os recursos e servizos municipais dirixidos á mocidade. O prazo para presentar as candidaturas permanecerá aberto ata o vindeiro 13 de outubro.

O programa baséase na información entre iguais, de maneira que serán as propias mozas e mozos participantes as encargadas de actuar como enlace entre os Espazos Municipais de Información Xuvenil e o alumnado dos seus centros. As Antenas permitirán así difundir información sobre actividades, convocatorias, recursos e oportunidades de interese para a mocidade, ao tempo que facilitarán unha canle para trasladar ao Concello as súas propostas, intereses e inquedanzas.

A concelleira de Benestar Social, Participación e Igualdade, Nereida Canosa, destacou o valor desta fórmula para achegar os servizos públicos á poboación nova. "As Antenas permítennos levar os recursos municipais aos espazos nos que as mozas e mozos desenvolven boa parte do seu día a día e facelo contando coa súa participación directa, facilitando que a información circule entre iguais dunha maneira próxima e accesible", sinalou.

As persoas participantes estarán conectadas cos Espazos Municipais de Información Xuvenil do Fórum Metropolitano, Ágora e Naves do Metrosidero. Entre as súas funcións estará manter unha comunicación periódica con estes servizos, actualizar semanalmente a información dispoñible nos seus centros e difundila tamén a través das canles dixitais habilitadas para o programa.

A convocatoria está dirixida a alumnado de entre 15 e 25 anos, cumpridos a 31 de decembro de 2026, matriculado nos centros educativos incorporados ao programa. Inclúense IES, CIFP, a Escola Oficial de Idiomas, a Escola de Arte e Superior de Deseño Pablo Picasso e o Conservatorio Profesional de Música, así como centros concertados con ESO e Bacharelato. As candidaturas poderán presentarse de maneira individual ou conxunta, cun máximo de dúas persoas por proxecto.

"Queremos que este programa sirva tamén para escoitar á mocidade e coñecer de primeira man que información demanda, que asuntos lle preocupan e que propostas quere trasladar, reforzando unha comunicación bidireccional que nos axude a adaptar os recursos municipais á súa realidade", apuntou Canosa.

Formación e recursos para as persoas participantes

As Antenas desenvolverán a súa actividade entre novembro de 2026 e maio de 2027. Ao longo deste período, as persoas seleccionadas recibirán formación específica para desenvolver o seu labor e participarán en reunións de coordinación cos Espazos Municipais de Información Xuvenil.

O Concello facilitará a cada proxecto os medios necesarios para o desenvolvemento da actividade, entre eles unha tableta con conexión wifi, e habilitará unha conta de correo electrónico específica. As persoas participantes poderán tamén solicitar gratuitamente o carné internacional de estudante e recibirán un certificado acreditativo ao remate do programa, ademais de poder acceder a entradas para determinadas actividades organizadas ou programadas polo Concello.

Cada proxecto contará cunha compensación de 100 euros brutos unha vez completada a colaboración anual. No caso das candidaturas integradas por dúas persoas, esta cantidade repartirase entre ambas.

A convocatoria contempla tamén os denominados proxectos de natureza singular, que permiten desenvolver iniciativas de aula coa participación de máis de dúas persoas e baixo a coordinación dunha persoa docente. Esta modalidade busca adaptar as Antenas ás dinámicas dos diferentes centros e ampliar as posibilidades de implicación do alumnado.

As persoas interesadas deberán presentar a documentación establecida nas bases xunto cun proxecto no que expoñan os seus intereses e expectativas e formulen propostas para dinamizar a información xuvenil no seu centro. Na selección valoraranse aspectos como a experiencia participativa, a continuidade no centro e a viabilidade, orixinalidade e adecuación das propostas presentadas. No caso das persoas menores de idade será necesaria a autorización da nai, pai ou persoa que exerza a titoría legal.

Coa convocatoria para o novo curso, as políticas de mocidade desenvolvidas polo goberno de Inés Rey dan continuidade a unha ferramenta que complementa a atención presencial e dixital da Rede Municipal de Información Xuvenil e reforza a súa presenza nos centros educativos, favorecendo tanto o acceso da mocidade aos recursos dispoñibles como a súa participación activa.

O prazo para presentar candidaturas estará aberto ata o 13 de outubro. As solicitudes deberán remitirse ao correo electrónico cmix@coruna.gal, mentres que as bases, os formularios e o resto da información sobre a convocatoria están dispoñibles na web municipal de Información Xuvenil. As consultas tamén poden realizarse a través do teléfono 981 184 294 e do WhatsApp 606 362 366.

Información e convocatoria das Antenas de Información Xuvenil 2026-2027:  Antenas de Información Xuvenil curso 2026-2027