O Concello avanza coa primeira fase do Plan de barrios 2025-27 e completa dúas novas intervencións de mellora nos barrios de Elviña e na Falperra, onde xa se concretaron as últimas tarefas correspondentes á reurbanización das rúas Rafael Alberti e Antón Vilar Ponte.

A alcaldesa, Inés Rey, supervisou esta mañá as actuacións executadas, que supuxeron un investimento superior aos 780.000 euros no seu conxunto. Estas actuacións abordáronse atendendo ás demandas veciñais e consensuando coas asiciacións veciñais e as persoas residentes as súas posibles necesidades. A alcaldesa estivo acompañada pola concelleira de Infraestruturas e Mobilidade, Noemí Díaz, polo concelleiro de Urbanismo, Rehabilitación e Vivenda, Francisco Díaz Gallego, e por representantes veciñais e residentes no barrio.

A filosofía de traballo que se seguiu en Rafael Alberti e Antón Vilar Ponte foi semellante, aínda que tendo en conta as circunstancias propias de cada unha das rúas: en ambas aproveitouse o ancho previo da calzada para ampliar a superficie peonil nas beirarrúas -modernizando tamén o seu pavimento- e, desta forma, mellorar a súa accesibilidade. Ademais, tamén se renovou a superficie do firme e sumáronse novos exemplares de arboredo para reverdecer e osixenar máis as dúas rúas.

Actuacións nas áreas axardinadas de Rafael Alberti para evitar filtracións

A reurbanización da rúa Rafael Alberti supuxo a remodelación de 3.350 metros de superficie, que tamén permitiu reconfigurar a distribución das áreas axardinadas, para evitar filtracións nos garaxes da zona. 

Isto sumouse a unha actuación previa que o Concello xa completou o ano pasado na mesma rúa, coa creación dun pequeno espazo biosaudable que reforzou os equipamentos públicos ao aire libre nesta parte do barrio.

Unha rúa Antón Vilar Ponte máis accesible e con mellores pavimentos

No caso de Antón Vilar Ponte renováronse 1.300 metros cadrados de superficie, con espazos peonís máis accesibles e, ademais, máis árbores ao longo da rúa.

A alcaldesa, Inés Rey, fixo fincapé no traballo de continuidade que está levando a cabo o Executivo local no conxunto do barrio, onde se renovou recentemente a súa pista deportiva e, en paralelo, avanza a execución das obras para rehabilitar o antigo mercado de Santa Lucía, inmerso actualmente nunha nova fase de traballos: a cimentación e construción da nova estrutura do edificio que acollerá o centro de saúde e os demais equipamentos públicos alí previstos.

En marcha os traballos en Arquitecto Rey Pedreira e Archer Milton

Tras a finalización das obras de mellora en Rafael Alberti e Antón Vilar Ponte, o Concello focaliza agora os seus esforzos en novas actuacións que xa están en marcha en barrios como Labañou, Monte Alto e a contorna do Peruleiro. Desde esta semana xa está en execución a reordenación da rúa Archer Milton Huntington, que permitirá gañar 30 novas prazas de estacionamento gratuíto no barrio de Labañou; e, en paralelo, xa son visibles os traballos de humanización da rúa Arquitecto Rey Pedreira, que conecta a rolda de Outeiro co paseo de Rolda.

En Ángel Rebollo, onde as obras xa están nunha fase máis avanzada, o Concello ten previsto efectuar un investimento de 1,5 millóns de euros para actuar sobre o conxunto da rúa e mellorar a súa calidade urbana. En total, o Plan de Barrios avanza con 76 millóns de euros en obras xa executadas ou en proceso.