A Concellería de Medio Ambiente indica que procederá confiscar os exemplares equinos que se atopen ceibos en vía pública e que “xeren unha situación de perigo tanto para a veciñanza como para eles mesmos”. A titular desta área de Goberno, María García, indica que se trata dunha medida necesaria “a fin de garantir a seguridade, tanto das persoas, como dos propios animais, que poden ser atropelados en calquera momento”.

García indicou que o Goberno local “está a favor da existencia e convivencia de animais de tipo gandeiro dentro do municipio”, pero garantindo que estes exemplares “estean en boas condicións e cumpran con todas as normativas ao respecto”. “Este Goberno apoia o mantemento dos usos tradicionais ligados ao rural, pero en ningún caso de situacións que poidan supor un perigo para a veciñanza”, explica.

A concelleira salientou o caso concreto de determinados exemplares equinos que se atopan na zona de Bens. “O Concello leva meses traballando e ocupándose deste caso, sendo a intención que estes animais sexan cercados para poder garantir tanto a seguridade na zona como que a situación na que se atopan sexa óptima”, indican, á vez que engaden que “a veciñanza da zona, con todo, manifestounos que a situación mellorou bastante nos últimos tempos”.

Esta medida encádrase dentro das políticas que está a fomentar o Goberno local de cara a favorecer e fomentar “unha adecuada convivencia entre os e as veciñas e os animais domésticos que vivan dentro do municipio”.