O Concello anunciou hoxe que destinará 500.000 euros a 26 asociacións que organizan festas nos barrios. Trátase do segundo ano consecutivo no que o Concello aposta por un sistema de concorrencia competitiva para a asignación das subvencións. O sistema, recordou o concelleiro de Cultura e Turismo, Gonzalo Castro, púxose en práctica por primeira vez o ano pasado, e obtivo tanto o recoñecemento das entidades como do público.

"A Coruña non se pode entender sen os seus barrios. O traballo das asociacións veciñais na cohesión social da comunidade é esencial, nese obxectivo as festas son un instrumento imprescindible, aportando tamén un apoio relevante ao tecido cultural da cidade. O Goberno de Inés Rey seguirá apoiando decididamente as festas de barrio pola súa trascendencia social e cultural", indicou Castro. Este ano aumentou o número de entidades solicitantes das axudas.

En total, o Concello destina 500.000 euros a sufragar 26 festas tradicionais que se celebran en toda a cidade. Cada asociación disporá entre 16.700 e 20.000 euros, fondos que poderán empregarse para aboar todos aqueles gastos vinculados á organización das festas. Entre os requisitos figuran que as celebracións sexan de carácter aberto e gratuíto. Son gastos subvencionables os cachés, alugueiro de equipos de son, transporte de materiais, iluminación, instalación eléctrica, seguros e aqueles que directamente sexan precisos para a organización das festas.

Ademais, o Concello daralles asesoramento a todas as entidades para axudarlles a completar o proceso. Tamén se cederán gratuitamente aseos químicos, valados, tarimas, mesas e cadeiras sempre que exista dispoñibilidade. "Trátase de axudar en todo o posible para que as festas nos barrios sexan un éxito", indicou o concelleiro.

As festas nos barrios neste 2026

• Festas do Barrio das Flores: 8, 9 e 10 de maio.
• Festas de Xuxán: 9 e 10 de maio.
• Festas dos Rosales: 29, 30 e 31 de maio.
• Foliagra: mes de xuño.
• Festas de Mesoiro e Vío: 6 de xuño.
• Festa dos Porcos (Labañou): 13 de xuño.
• Festas de Palavea: 13 e 14 de xuño.
• Festas do Martinete: 20 e 21 de xuño.
• Festas dos Mallos: 26 e 27 de xuño.
• Festas do Martelo (Martinete): 2, 3 e 4 de xullo.
• Festas de Bens: 5 de xullo.
• Festas de Peruleiro-Mariñeiros: 17, 18 e 19 de xullo.
• Romaría dos Castros: 17, 18 e 19 de xullo.
• Festas do Carme de Feáns: 17, 18 e 19 de xullo.
• Festas de Montelos: 18 de xullo.
• Festas da Gaiteira: 14, 15 e 16 de agosto.
• Festa da Fresa (Eirís): 19 de agosto.
• Festas do Castrillón: 19, 20 e 21 de agosto.
• Festas da Sagrada Familia: 21, 22 e 23 de agosto.
• Festas de Pedralonga: 22 de agosto.
• Festas de San Pedro de Visma: 26, 27 e 28 de agosto.
• Festas de San Vicente de Elviña: 5 e 6 de setembro.
• Festas da Falperra: 12 e 13 de setembro.
• Festas de Monte Alto: 19 e 20 de setembro.
• Festas do Rosario: 6 e 7 de outubro.
• Festas do Ventorrillo: 9, 10, 11 e 12 de outubro.