A alcaldesa da Coruña, Inés Rey, inaugurou esta mañá o novo mural da Escola Infantil Municipal Luís Seoane, unha obra da ilustradora Tania Solla en homenaxe ás cantareiras Rosa e Adolfina Casás. O mural visibiliza a achega destas dúas referentes á tradición oral e musical galega, e insírese nas accións impulsadas polo Concello no marco da celebración institucional do Día das Letras Galegas 2025.

O mural está situado na escola onde exerce como directora a neta de Rosa Casás e sobriña de Adolfina Casás, o que lle outorga un valor engadido a esta acción de recoñecemento promovida polo Concello.

No acto participaron tamén o concelleiro de Educación, Formación e Innovación Tecnolóxica, Juan Ignacio Borrego, e o concelleiro de Cultura e Turismo, Gonzalo Castro, quen destacaron o compromiso do Concello da Coruña coa defensa e promoción da cultura galega desde o ámbito educativo e institucional.

Por outra banda, a cidade viviu esta fin de semana unha intensa programación con motivo do Día das Letras Galegas, na que milleiros de persoas se achegaron a concertos, pasarrúas, representacións teatrais e actividades culturais en diferentes espazos públicos da cidade. O Goberno municipal sinala a alta participación cidadá e o compromiso do tecido cultural coruñés nunha das edicións máis ambiciosas e participativas dos últimos anos.