O Concello da Coruña inicia hoxe as obras de mellora da pista deportiva da Falperra, unha actuación orientada á renovación integral desta infraestrutura de uso público e que permitirá mellorar o pavimento, a iluminación e o equipamento deportivo do recinto.

A intervención inclúe a execución dun novo muro, a renovación do sistema de iluminación, a instalación de novas canastras, a mellora do pavimento deportivo mediante aplicación de resinas específicas e a substitución do cerramento perimetral da pista .

Nunha primeira fase dos traballos, prevista entre o 13 e o 20 de maio, executarase o muro de bloque, a cimentación das canastras e parte da instalación eléctrica e de iluminación. Durante este período manterase habilitado o paso peonil e compatibilizarase a execución da obra co uso parcial da instalación deportiva mediante un cerramento provisional da zona de actuación.

Posteriormente, unha vez estea dispoñible o novo cerramento galvanizado, procederase ao peche temporal completo da pista para acometer os traballos de instalación do vallado e a aplicación das resinas deportivas sobre o pavimento. Esta segunda fase está prevista a partir do 21 de maio e terá unha duración aproximada de dúas semanas, condicionada tamén polas condicións meteorolóxicas necesarias para executar os tratamentos de resina.

O concelleiro de Deportes, Manuel Vázquez, destacou que "esta actuación permitirá modernizar unha instalación moi empregada pola veciñanza, mellorando a súa seguridade, funcionalidade e calidade para a práctica deportiva diaria".

Esta actuación forma parte das liñas de investimento impulsadas polo Goberno de Inés Rey para continuar mellorando os equipamentos deportivos e os espazos públicos de proximidade nos barrios da cidade.