O Concello plantará a vindeira semana os olmos resistentes á grafiose no xardín de San Carlos. As árbores proceden dun viveiro especializado en Van der Berk, nos Países Baixos, e son exemplares de gran porte, con ata 8 metros de altura e un calibre que oscila entre 30 e 35 centímetros.

Os exemplares chegaron hai dúas semanas á Coruña e agardan nos propios xardíns o preceptivo permiso de Patrimonio. O dito permiso foi recibido esta semana, polo que nos vindeiros días procederase á súa plantación, paso previo para poder fixar unha data para a reapertura ao público dos históricos xardíns. 

Os novos exemplares, a diferenza dos que foron retirados, abatidos por unha enfermidade causada por un fungo que acabou con todos os olmedais de Europa, son dunha variedade desenvolvida precisamente para resistir a dita enfermidade. 

A plantación dos novos olmos forma parte do Plan de rehabilitación integral dos xardíns de San Carlos que está a desenvolver o Concello. Actualmente estanse a renovar os aseos públicos nese ámbito, e estase a preparar un estudo específico sobre as necesidades de restauración da muralla de San Carlos. Ademais, durante os últimos meses fixéronse tamén sondaxes arqueolóxicas para coñecer en profundidade o patrimonio histórico coruñés. Nas ditas campañas apareceron restos das antigas estruturas de carácter militar existentes, e estes restos teranse en conta na nova plantación para evitar que os sistemas radiculares das árbores poidan danalas. Por este motivo, plantaranse finalmente oito olmos sen que isto afecte á esencia do xardín. 

Ademais, nos exemplares máis achegados á muralla disporase un sistema separativo subterráneo para evitar que as raíces desas árbores poidan afectarlle á muralla como acontecía ata o de agora. 

A plantación das novas árbores non afectará á distribución dos parterres, que quedarán tal e como foron reconfigurados no pasado mandato recuperando a súa traza orixinal. "Moi pronto San Carlos volverá abrir e farao coa garantía de que a grafiose xa non lles afectará ás novas árbores", indicou a concelleira de Infraestruturas e Mobilidade, Noemí Díaz. 

Díaz indicou que as actuacións levadas a cabo en San Carlos coordináronse desde o primeiro momento con Patrimonio, unha coordinación con resultados positivos que garanten a conservación do espazo.