O Concello da Coruña iniciará no mes de abril un novo programa de charlas de educación viaria dirixido á poboación adulta, co obxectivo de fomentar hábitos seguros nos desprazamentos e reducir os riscos asociados aos atropelos en vías urbanas.

A primeira sesión terá lugar o vindeiro 14 de abril, ás 18.30 horas, no centro cívico dos Mallos, e marcará o inicio dun calendario de encontros que se desenvolverán de forma progresiva nos distintos barrios da cidade, achegando esta iniciativa a todos os centros cívicos municipais.

O programa desenvolverase nos meses de abril e maio co seguinte calendario de sesións:

• Mallos: 14 de abril, ás 18.30 h
• Monte Alto: 16 de abril, ás 10.00 h
• Cidade Vella: 21 de abril, ás 11.00 h
• Os Rosales: 23 de abril, ás 11.00 h
• Elviña: 30 de abril, ás 10.00 h
• San Diego: 5 de maio, ás 10.30 h
• Castrillón: 6 de maio, ás 10.00 h
• Eirís: 7 de maio, ás 10.30 h
• Monelos: 12 de maio, ás 11.00 h
• Novo Mesoiro: 15 de maio, ás 11.05 h
• Mesoiro: 20 de maio, ás 12.00 h
• Palavea: 26 de maio, ás 17.30 h

Este programa enmárcase nas políticas municipais de prevención e seguridade viaria, que buscan reforzar a información e a sensibilización cidadá sobre o uso responsable do espazo público. Neste sentido, prestarase especial atención a cuestións como o respecto das normas de circulación, o uso adecuado dos pasos de peóns ou a convivencia entre peóns e vehículos.

Diversos estudos e datos de seguridade viaria sinalan que unha parte significativa dos atropelos prodúcense en contornas urbanas e están relacionados con distraccións ou prácticas de risco no cruzamento de vías. Por iso, estas accións formativas céntranse na prevención e na adquisición de rutinas seguras, contribuíndo a reducir a sinistralidade e a mellorar a convivencia nas rúas.

A concelleira de Seguridade Cidadá, Montserrat Paz, destacou que este tipo de programas "son fundamentais para seguir avanzando cara a unha cidade máis segura, na que todas as persoas coñezan e respecten as normas básicas de circulación, reducindo así os riscos no día a día".

O Goberno de Inés Rey reforza así a súa aposta por unha mobilidade sostible, segura e accesible, en liña coas accións impulsadas nos últimos anos para mellorar os espazos públicos e a convivencia urbana, tal e como recollen as liñas de actuación municipal en materia de mobilidade e seguridade .

Con esta iniciativa, búscase non só informar, senón tamén implicar á cidadanía na construción dunha cultura viaria baseada na responsabilidade compartida e no respecto mutuo.