O concelleiro de Cultura e Turismo, Gonzalo Castro, presentou esta mañá a primeira edición de Colón Cinema, unha nova proposta cultural que converterá o Teatro Colón nunha gran sala de cinema entre os meses de setembro e decembro. O ciclo, dirixido por Javier Trigales, reunirá sete películas fundamentais da historia da sétima arte en versión orixinal subtitulada, acompañadas de coloquios posteriores con recoñecidas personalidades do ámbito cultural. 

A iniciativa nace coa vocación de ofrecer ao público a oportunidade de revisionar no gran formato da pantalla cinematográfica algunhas das obras máis influentes da historia do cinema, ao tempo que promove o diálogo e a reflexión a través de conversas abertas con creadoras e creadores de disciplinas diversas. Ademais, con este ciclo, o Goberno de Inés Rey busca recuperar o uso coma sala de proxeccións do Teatro Colón.

Durante a presentación, Gonzalo Castro destacou a importancia de seguir ampliando a programación cultural municipal con propostas innovadoras. "Desde o Goberno de Inés Rey queremos que os nosos equipamentos culturais sexan espazos vivos e abertos a múltiples disciplinas. Colón Cinema permite recuperar grandes clásicos do cinema, pero tamén crear un espazo de encontro arredor da cultura contemporánea e do pensamento crítico", sinalou.

O ciclo permitirá contemplar obras de cineastas fundamentais como David Lynch, Luis García Berlanga, Andrei Tarkovski, Kenji Mizoguchi, Charles Chaplin, Ingmar Bergman e Agnès Varda, configurando un percorrido por distintas épocas, estilos e tradicións cinematográficas. Cada proxección estará acompañada por unha conversa posterior cunha persoa convidada vinculada ao mundo da cultura. Participarán o debuxante e autor de banda deseñada David Rubín, a artista Samantha Hudson, a escritora e crítica de arte María Von Touceda, o escritor Antonio Muñoz Molina, a actriz e bailarina Janet Novás, o crítico cinematográfico e director do CCCB Jordi Costa e a fotógrafa da axencia Magnum Lúa Ribeira. 

"Estamos ante unha proposta singular que establece pontes entre o cinema e outras disciplinas artísticas. Os coloquios permitirán achegar novas lecturas e perspectivas sobre películas que continúan dialogando co presente décadas despois da súa estrea", indicou Castro. Todas as sesións celebraranse ás 19.30 horas, agás a proxección de 'Sin techo ni ley', que terá lugar o domingo 20 de decembro ás 19.00 horas. 

Programación de Colón Cinema

• 24 de setembro | 19.30 h
  • Mulholland Drive (David Lynch, 2001)
  • Con David Rubín. 
• 1 de outubro | 19.30 h
  • El verdugo (Luis García Berlanga, 1963)
  • Con Samantha Hudson. 
• 22 de outubro | 19.30 h
  • El espejo (Zerkalo, Andrei Tarkovski, 1975)
  • Con María Von Touceda. 
• 5 de novembro | 19.30 h
  • Cuentos de la luna pálida (Ugetsu monogatari, Kenji Mizoguchi, 1953)
  • Con Antonio Muñoz Molina. 
• 19 de novembro | 19.30 h
  • Tiempos modernos (Modern Times, Charles Chaplin, 1936)
  • Con Janet Novás. 
• 3 de decembro | 19.30 h
  • El séptimo sello (Det sjunde inseglet, Ingmar Bergman, 1957)
  • Con Jordi Costa. 
• 20 de decembro | 19.00 h
  • Sin techo ni ley (Sans toit ni loi, Agnès Varda, 1985)
  • Con Lúa Ribeira.