O Concello da Coruña aproveitará as actuacións que o Estado está a executar na avenida de Alfonso Molina para reforzar o sistema de abastecemento de auga da cidade e incrementar a súa capacidade de resposta ante futuras incidencias. Con motivo dos traballos previstos para este xoves nunha das principais conducións da rede, A Coruña contará cunha alternativa de abastecemento que permitirá manter o servizo durante a intervención e reforzar as garantías de subministro en toda a rede no futuro.

A intervención, que executa Carreteras, forma parte da reposición dos servizos afectados polas obras de mellora da capacidade da avenida de Alfonso Molina (AC-11), promovidas polo Ministerio de Transportes e Mobilidade Sostible. As obras estatais afectaron ás canalizacións existentes, polo que é necesario executar o entronque da nova condución coa rede xeral de abastecemento. Este xoves, 24 de setembro, levarase a cabo esta actuación.

A operación afecta a unha das principais arterias do sistema, polo que durante a xornada de mañá poderanse dar casos de turbidez na cidade. Para evitar que a intervención implique unha interrupción xeneralizada do servizo, realizaranse diferentes manobras hidráulicas antes e durante a xornada do xoves e porase en funcionamento a conexión co depósito de Monte Mero (con 47.000 metros cúbicos de capacidade) para garantir o subministro non só durante os traballos previstos mañá, senón tamén ante calquera incidencia que se poida producir na rede nun futuro.

A operación permitirá optimizar o funcionamento hidráulico da rede, ampliar as alternativas dispoñibles para a distribución da auga e mellorar a súa capacidade de resposta ante futuras intervencións ou incidencias nas conducións principais.

EMALCSA, como empresa municipal responsable da xestión do ciclo integral da auga, coordinará as manobras necesarias antes e durante a xornada do xoves e realizará un seguimento continuo do comportamento da rede para garantir a correcta execución da operación e minimizar as posibles afeccións ás persoas usuarias.

Posibles episodios puntuais de turbidez

Os cambios temporais nos caudais e nas condicións de circulación da auga poderán provocar episodios puntuais de turbidez nalgúns puntos da rede como consecuencia das manobras hidráulicas necesarias para levar a cabo a intervención. Os equipos técnicos manterán un seguimento continuo da operación para minimizar as posibles molestias e actuar ante calquera incidencia.

Con esta actuación, o Concello aproveita a reposición dun servizo afectado polas obras estatais de Alfonso Molina para conectar a rede co depósito de Monte Mero, reforzando así as alternativas de subministración e a capacidade de resposta da rede de abastecemento da Coruña ante posibles incidencias futuras.