O ciclo internacional de poesía Poetas Di(n)versos, organizado polo Concello da Coruña, continúa a súa décimo sétima edición cun recital excepcional que terá lugar o luns 26 de xaneiro, ás 20.00 horas no Centro Ágora. Por primeira vez en case dúas décadas de historia, participará no ciclo un autor galardoado co Premio Nobel de Literatura: o nixeriano Wole Soyinka, unha das grandes figuras vivas das letras universais. Acompañarao a poeta galega Lupe Gómez, autora fundamental da poesía contemporánea en lingua galega.

O concelleiro de Cultura, Gonzalo Castro, salientou que "a cidade da Coruña ten a sorte de acoller un encontro literario histórico" e engadiu que "a presenza dun Premio Nobel africano e dunha das autoras máis recoñecidas da nosa literatura reafirma o valor de Poetas Di(n)versos como plataforma cultural de primeiro nivel". Castro destacou tamén que "este ciclo demostra, edición tras edición, que a poesía pode ser un espazo de diálogo entre continentes, xeracións e linguas, aberto a toda a cidadanía".

 Pola súa parte, a directora do ciclo, Yolanda Castaño, subliñou que "en 17 anos de PoetasDi(n)versos é a primeira vez que acode un Premio Nobel" e engadiu que "Soyinka anunciou a súa retirada inminente, polo queesta será seguramente a súa última aparición pública en España".

Poetas Di(n)versos mantén o seu formato habitual, con recitais mensuais entre outubro e xuño nos que dialogan unha voz galega e outra internacional. O ciclo é hoxe unha referencia consolidada na programación literaria do país e desvela a súa programación trimestre a trimestre.

Wole Soyinka (Nixeria, 1934) foi o primeiro africano en recibir o Premio Nobel de Literatura, en 1986. Poeta, dramaturgo, narrador e ensaísta, publicou máis de corenta obras e recibiu recoñecementos académicos e culturais de ámbito mundial. A súa obra abrangue títulos como O león e a xoia, A morte e o cabaleiro do rei, Idanre, A terra de Mandela e outros poemas ou Cánticos para unha pira anunciada (2024), estreado en Abu Dabi e Ibadán. Actualmente imparte docencia na Universidade de Nova York en Abu Dabi e mantén unha intensa actividade intelectual e cívica.

Lupe Gómez (Fisteus, Curtis, 1972) é poeta, narradora e xornalista. Licenciada en Ciencias da Comunicación, é autora dunha obra ampla e diversa, traducida a varias linguas e distinguida con premios como o Miguel González Garcés, o da Crítica Española, o Rosalía de Castro ou o Carlos Oroza. Entre os seus títulos máis recentes figuran Herbario da noite pecha (2024) e A pintora. Caixóns de auga malva (2025). O seu estilo, profundamente persoal e comprometido coa identidade e a memoria, converteuna nunha das voces máis recoñecidas da literatura galega actual.

A sesión de xaneiro dará comezo á programación do primeiro trimestre do ano, que incluirá tamén os recitais previstos para febreiro e marzo. Como é habitual no ciclo, cada cita reúne unha voz galega e unha internacional, consolidando este espazo como unha das principais plataformas poéticas da Península.

As próximas datas serán:

• Luns 16 de febreiro: a grega Dimitra Christodoulou e a galega Carmen Villar, nun encontro no que, máis que ornamento ou consolo, "a poesía sostén a fraxilidade do mundo" tanto para unha das autoras máis consagradas de Grecia como para esta poeta galega nada en Zúric
• Luns 23 de marzo: o colombiano Rómulo Bustos e o galego Xoán C. Rodríguez, nun recital onde o uso da ironía e a poesía como pensamento crítico atravesan tanto o antigo membro do colectivo Ronseltz coma o Premio Nacional de Poesía de Colombia

O ciclo, impulsado polo Concello da Coruña, conta coa dirección literaria de Yolanda Castaño e mantén a súa sede habitual no Auditorio do Centro Ágora, consolidándose como un espazo estable, accesible e de prestixio para o encontro coa poesía.

A entrada aos recitais é libre ata completar aforo.