O vindeiro luns 20 de abril reiniciarase o programa de Lecer do Fórum Metropolitano e Centro Sociocultural Ágora. Durante o día de hoxe a nova empresa responsable das actividades comezará a comunicarse co profesorado coa fin de por en marcha en ambos centros os obradoiros, que se celebrarán ata o 5 de xuño. A continuación, como é habitual na programación, terán lugar as actividades de clausura, nesta ocasión durante dúas semanas, do 8 ao 19 de xuño para, despois, deixar paso aos campamentos de verán.

O reinicio do programa de Lecer de primavera permitirá retomar os talleres, as actividades de clausura e os campamentos de verán previstos. "Damos solución de maneira áxil a unha situación complexa e pensando en todo momento nas persoas usuarias deste programa, así como no profesorado afectado", indicou Gonzalo Castro, concelleiro de Cultura e Turismo.

Nos vindeiros días, as persoas interesadas poderán consultar toda a información sobre a programación e inscripción na páxina web, nas redes sociais do Concello e nos propios centros.