O Concello da Coruña organiza durante o mes de marzo o ciclo Mulleres de Cine, unha iniciativa municipal que se celebrará no Teatro Colón e que reunirá a mulleres de diferentes ámbitos culturais, que programarán películas que marcaron o seu percorrido vital ou creativo.

Esta programación enmárcase na programación cultural en torno ao Día Internacional da Muller, do 8 de marzo, e contará coa participación de Ledicia Costas, Aida Tarrío, María Vázquez, Bea Lema e Candela Sierra. A alcaldesa, Inés Rey, acompañada pola ilustradora Bea Lema, presentou esta mañá a programación.

"Este ciclo nace como unha proposta cultural comprometida coa igualdade, coa visibilización das voces femininas e coa promoción dunha programación diversa e accesible á cidadanía", indicou a alcaldesa. Cada sesión estará comisariada por unha profesional destacada, que escolleu unha obra cinematográfica significativa para compartir co público e reivindicar, a través do cinema, novas miradas sobre o papel das mulleres na sociedade e na cultura. Proponse así unha experiencia cinematográfica construída a partir de cinco voces femininas. 

Cada sesión articúlase a través da proxección e o coloquio, tecendo un relato común arredor do feminismo, entendido como mirada, experiencia e transformación colectiva. Unha reivindicación do cinema como espazo de encontro, reflexión e voz.

Ademais, na primeira sesión do ciclo, o vindeiro 7 de marzo (20.00 horas), Bea Lema estrea a súa curta 'O corpo de Cristo', inédita en Galicia, baseada no cómic homónimo que lle valeu o Premio Nacional del Cómic en 2024. Nesta presentación estará acompañada por Candela Sierra, tamén Premio Nacional del Cómic en 2025 e autora de 'Lo sabes aunque aún no te lo he dicho', nunha sesión titulada 'Habitar o incómodo'.

O 8 de marzo (17.00 horas), a actriz 
María Vázquez
 presentará 'Los pequeños amores' (Celia Rico, 2024). O 12 de marzo (20.00 horas) será a quenda da artista 
Aida Tarrío
, que escolleu a película 'Todo sobre mi madre' (Pedro Almodóvar, 1999). O 22 de marzo (19.00 horas), a escritora 
Ledicia Costas
 presentará a proxección de 'La quimera' (Alice Rohrwacher, 2023).

Cada sesión incluirá unha breve presentación a cargo das programadoras convidadas, que compartirán a súa visión sobre a obra seleccionada e o seu vínculo co 8M, fomentando un encontro co público arredor da creación, da identidade e das narrativas no cinema. Cada sesión terá un prezo de 5 euros, con posibilidade de bonificación para distintos colectivos, e as entradas poderán adquirirse en Ataquilla, no despacho de billetes da praza de Ourense e no propio teatro os días da proxección. As entradas saen este mesmo venres á venda.