Nas vindeiras semanas, o Concello da Coruña programará, a través da rede municipal de Museos Científicos Coruñeses, as novas sesións da actividade «Aventura coas focas», que volve ao Aquarium Finisterrae neste mes de outubro e tamén en novembro.

«Aventura coas focas» é un taller de divulgación científica dirixido a persoas maiores de 7 anos, no que se participa na preparación dos alimentos e se accede ás plataformas exteriores onde se alimenta e revisa o estado destes mamíferos mariños. 

As persoas participantes deberán acreditar a súa idade con DNI ou fotografía do libro de familia onde figure o nome e a data de nacemento. Ademais, as nenas e nenos deberán ir acompañados durante toda a actividade por unha persoa adulta que se fará cargo dun máximo de 2 menores.

Esta actividade non ten custo engadido ao prezo que cada visitante deba aboar para entrar no recinto, pero require a reserva de entradas para todas as persoas participantes. Polas características da actividade, ofértanse só 12 prazas en cada sesión. Haberá 9 sesións, o que supón un total de 108 prazas. 

A reserva de entradas poderá realizarse a partir do 15 de outubro ás 9.00 da mañá, a través da plataforma de ticketing do Concello.