A vindeira semana arrincarán os traballos de humanización da rúa lindeira á praza da Tolerancia, no barrio de Labañou, unha intervención demandada pola veciñanza da contorna e coa que o Concello integrará paisaxisticamente este percorrido co parque e a área infantil lindeira.

As obras, que suporán un investimento de 90.000 euros, consistirán na creación dunha plataforma única entre as rúas Almirante Romay e Arxentina e mellorarán o tránsito peonil entre a praza da Tolerancia e os edificios con acceso á rúa homónima, un dos compromisos asumidos polo Goberno de Inés Rey ao abeiro do plan de melloras previsto no distrito.

A concelleira de Infraestruturas e Mobilidade, Noemí Díaz, razoou que "neste punto do barrio é frecuente o paso de persoas viandantes en dirección ao parque infantil. Estes fluxos de mobilidade achégannos unha idea precisa de onde actuar para reforzar a seguridade viaria e, ao mesmo tempo, darlles un sentido a espazos públicos da cidade que, polo seu incremento de usos ou polos equipamentos da súa contorna, precisan dunha adaptación".

Díaz apuntou que este é o caso, xa que a rúa lindeira á praza da Tolerancia linda con bloques residenciais e portais que agora, con esta peonalización definitiva, contarán cun percorrido natural cara á área infantil e cara ao parque. "Ademais, neste treito non existen garaxes, polo que o impacto para o tráfico rodado e para a veciñanza será mínimo", explicou a concelleira.

O punto de partida das obras, tras as festas de San Xoán

A previsión dos servizos municipais é que as obras arrinquen o vindeiro mércores 25, unha vez que rematen as festas de San Xoán. Será entón cando se inhabilite o paso de vehículos pola rúa.

Os traballos comezarán, previsiblemente, coas melloras previstas nas infraestruturas municipais, que inclúen a reposición dun colector, polo que nos días previos xa se pintará e se sinalizarán os servizos sobre o pavimento.

A intervención, que foi aprobada a través dos Orzamentos Participativos, conta cun prazo de execución duns catro meses, sempre e cando as condicións meteorolóxicas sexan favorables para o desenvolvemento das obras.