A alcaldesa, Inés Rey, e as concelleiras de Industria e Medio Ambiente, Eva Martínez e Esther Fontán, visitaron esta mañá a fábrica de Coca-Cola European Partners (CCEP) Iberia en Alfonso Molina, acompañadas de Juan Carballal, xerente da planta da Coruña; Gonzalo Márquez, xerente de Comunicación; María Sande, xefa de Comunicación da Rexión Noroeste; e Isidro Dorado, xerente comercial da Rexión Noroeste.

No encontro, as representantes do concello coñeceron os principais datos da compañía, a situación actual do mercado de hostalaría na rexión, así como o proceso produtivo e o compromiso medioambiental da planta. Rey destacou que a presenza de Coca-Cola na Coruña, ademais de supoñer unha canle de emprego desde hai case 60 anos, dálle un valor estratéxico ao sector, directa e indirectamente. A rexedora valorou positivamente as medidas que se están tomando por parte da firma de cara a conservar a súa contorna xa que "as grandes empresas deben ser un exemplo para que as pequenas loiten tamén a prol da sustentabilidade".