Máis de 60 hectáreas, unha superficie de lecer de 9.500 m2, un total de case 13 km de carreiros para percorrer, 2000 m2 de estanques con patos, 230 puntos de luz, abundante mobiliario urbano... Estes datos revelan a firme aposta da Coruña por dotarse dun extraordinario espazo de recreo no que se conxugan a conservación e a recuperación da natureza coas actividades de lecer e aire libre propias dunha cidade moderna.

Este parque, desenvolvido polo Concello coa colaboración da Unión Europea e do Estado, nace froito da solidariedade e da defensa do medio ambiente. Supón a culminación dun proxecto común de toda a cidade xa que nos permite cerrar unha das páxinas máis difíciles que nos tocou vivir na historia da cidade cando aquí se derrubou o vertedoiro do mesmo nome.

No Parque de Bens a veciñanza da Coruña e as persoas visitantes poden pasear e descubrir novas vistas sobre a cidade, o Golfo Ártabro ou o mar aberto, vistas perdidas desde había anos. Desta maneira tamén a mirada se recuperou.

O 5 de xuño de 2001, menos de cinco anos despois do derrubamento do antigo vertedoiro, e coincidindo co Día Mundial do Medio Ambiente, inaugurábase o espazo. O día da súa apertura foron máis de 30.000 coruñeses/as, convidados/as persoalmente, os/as que viñeron ata aquí darlle a benvida á cidade a este novo espazo verde, ao que aínda lle quedan moitos anos para desenvolverse.

Pero o Parque de Bens é moito máis: moito máis que amplas zonas verdes, carreiros e lagoas. É, sobre todo, unha nova forma de pensar a Terra, o noso planeta, feita realidade. O Parque de Bens é recuperación e conservación de valores naturais, históricos, paisaxísticos, arquitectónicos,... Todo iso integrado no desenvolvemento das nosas capacidades como cidadanía e como cidade.

O Parque de Bens é harmonía. Entre cada un de nós e a natureza.

Datos clave:

• Superficie total: 605.000 m2
• Superficie valada vertedoiro: 215.000 m2
• Superficie recuperada: 302.000 m2
• Espazo natural : 88.000 m2
• Lixo recolocado: 1.300.000 m3
• Movemento de terras: 725.00 m3
• Tubaxes lixiviadas e drenaxes: 14.325 ml
• Tubaxes captación de gas: 4.480 ml
• Pozos captación de gas: 76 u.
• Perforacion vertical recuperación gas: 2.110 ml
• Estanques iluminados fibra óptica: 2.050 m2
• Impermeabilización: 210.00 m2
• Hidrosemente e céspede: 515.000 m2
• Puntos de luz: 232 u.

Datos de interese:

• Inauguración: 5 de xuño de 2001.
• O parque ten unha superficie de 390.000 m². Conta con dous lagos, un con fervenza, que ocupan 2.500 m².
• Nel atópase o barco «Blanca Quiroga» doada pola Cruz Vermella. Foi a primeira lancha de salvamento de España.