Como é lóxico, consumir os produtos agrícolas e gandeiros respondería, no súa maior parte, ás actividades diarias. Con todo, a celebración de determinadas actividades implicaba, tamén, unha forma de consumir produtos completamente distinta e en lugares específicos, que pode rastrexarse desde a arqueoloxía e que achega información moi relevante sobre as sociedades do pasado.

Unha das partes principais do comercio era o consumo dos bens obtidos. Habitualmente, o propio acto de intercambiar bens levaba realizar ritos relixiosos, grandes banquetes e actividades grupais. Deste feito, contamos con evidencias na península da Coruña, onde se atoparon abundantes restos de consumo de bens, incluíndo viño e produtos foráneos nunha área na que non se vivía, senón que se recibían produtos e realizábanse actividades de interacción cos navegantes mediterráneos.

O Edificio dos Betilos quizais contou cunha funcionalidade semellante, pois a interpretación actual suxire que se trataba dun espazo culturalmente "mixto" no que ártabros e foráneos (probablemente gaditanos) realizarían actividades relacionadas co intercambio. Entre elas, destaca a realización de actividades relixiosas na estancia que acolle os betilos, pero tamén a realización de grandes banquetes noutra das súas estancias, tal e como testemuña un concheiro con restos de moluscos, bóvidos, suidos e ánforas de viño.

É posible que outros actos festivos e rituais relacionados co consumo se realizasen en estancias de carácter colectivo ou relixioso, como a Estrutura Oval ou o Templo do Ídolo Fálico. Ambas as estancias contan cun banco corrido, que implicaba a distribución dos participantes de forma ordenada ao redor dun espazo colectivo. Segundo Estrabón, esta distribución era habitual en festas e actividades sinaladas, e organizábanse segundo rango, sexo e idade.