CALRÚS

Nado na Coruña e veciño de Santiago de Compostela, licenciado en Antropoloxía Social e Cultural.

A miña paixón pola fotografía comezou na adolescencia. Aos 15 anos caeu nas miñas mans a miña primeira cámara fotográfica, unha Kodak Instamatic 25 que aínda conservo en perfectas condicións; unha cámara moi limitada, con enfoque fixo e que só che permitía facer un único axuste. A súa calidade era moi pobre, pero para min ten moito valor.

Na "época analóxica", montei un humilde laboratorio de branco e negro nun armario encaixado, no que compartía as miñas horas libres con reveladores e fixadores, lámpadas vermellas e cubetas, en busca dunha bonita fotografía. Hoxe todo é diferente.

"O retrato é o meu xénero preferido. Captar a beleza do ser humano: esas expresións inocentes, serenas, perdidas, atentas, profundas; o brillo da mirada, esa mirada firme, viva, directa, triste, alegre; as mans, os sorrisos...

Apaixóname viaxar e coñecer outras culturas, algo que levo facendo desde hai máis de 30 anos. Gústame facer un tipo de viaxe pouco convencional e non me importa prescindir de moitas comodidades. Encántame utilizar os transportes públicos, que fan que vivas máis e mellor a realidade do lugar, que sexas testemuña de acontecementos cotiáns, que entendas e compartas moitas situacións."