O concello, a través da Concellería de Educación e Cultura, comeza a empregar o cancelo#corunaencasa nas súas canles sociais (Facebook e Twitter) para informar a cidadanía de todas as actividades culturais e educativas das que pode desfrutar sen moverse da casa neste período de confinamento decretado polo estado de alarma no país por mor do Covid-19.

A iniciativa está dirixida a nenas/os, mocidade e persoas adultas que dispoñen de internet nos seus fogares. Todas as persoas interesadas poderán seguir o cancelo #corunaencasa, que se engadirá en todas as publicacións da conta da Concellería de Educación e Cultura, para saberen día a día das novas actividades que irán saíndo.

Os coruñeses e as coruñesas poderán seguir a programación das Bibliotecas Municipais, os Museos Científicos, a Orquestra Sinfónica de Galicia, a Banda Municipal de Música, o Teatro Rosalía Castro, o Teatro Colón, o Museo Arqueolóxico, as casas museo e exposicións en xeral.