A Oficina Municipal de Información ao Consumidor (OMIC), a través do programa Consumo Coruña Educa, pechou o prazo de inscrición nos seus programas educativos para o curso 2025/2026 cunha resposta excepcional por parte dos centros escolares da cidade. Entre o 16 de setembro e o 16 de outubro, os programas "Obradoiros Educativos" e o programa "Visita o teu mercado" acadaron cifras históricas de participación, consolidándose como referentes na educación para o consumo responsable.

Obradoiros Educativos: formación para un consumo consciente

Este programa, clave na promoción de hábitos saudables e sostibles, se solicita por parte dos centros para un total de 8.301 participantes e 394 obradoiros que se desenvolverán ao longo do curso escolar 2025/2026. A temática máis demandada foi "Froitas e verduras", evidenciando o interese crecente por unha alimentación saudable desde idades temperás.

Estes obradoiros fomentan a análise crítica da publicidade, o coñecemento dos dereitos como consumidores e a reflexión sobre o impacto das tecnoloxías no consumo, especialmente na adolescencia.

Programa Visita o teu Mercado

Dirixido ao alumnado de Educación Primaria, este programa promove o consumo responsable e os hábitos saudables na alimentación poñendo en valor os mercados municipais. Participarán uns 1.246 estudantes en 60 visitas xa programadas para todo o curso escolar cubrindo a totalidade das prazas dispoñibles. Ademais, quedaron 21 visitas en lista de agarda, o que reflicte o éxito da iniciativa.

Durante as visitas, o alumnado poderá coñecer produtos frescos, interactuar coas persoas praceiras e reflexionar sobre a importancia do consumo local e sostible.

Todas as actividades xa comenzaron o pasado día 1 de outubro e durarán todo o curso escolar.

A OMIC reafirma o seu compromiso coa educación para o consumo, formando cidadáns e cidadás críticos, responsables e comprometidos co benestar social e ambiental.