O estudo, do Instituto Nacional de Consumo (INC), obtívose a partir das 74.514 enquisas realizadas nos fogares españois, cun total de 206.588 persoas, e proporciona unha cifra indicativa de 2.576.601  accidentes (5,46 accidentes cada 100 habitantes). O Informe DADO contempla "todo accidente producido no ámbito doméstico ou acaecido durante o desenvolvemento das actividades de lecer ou deportivas e que necesitase de coidados sanitarios". Quedan excluídos, polo tanto, os accidentes por motivos laborais, de trafico, por elementos naturais, ferroviarios, marítimos ou aéreos, ademais dos vinculados con enfermidades, autolesiones e violencia. O estudo realizado polo INC ten como finalidade alcanzar o maior grao de protección do consumidor, sobre todo dende o punto de vista da prevención en materia de seguridade dos produtos, no ámbito do fogar nas zonas de recreo.  

PERFIL DOS ACCIDENTADOS  

O 58,7% do total de accidentados foron mulleres e o 41,3%, homes. En canto a idade, o grupo de maior risco é o de 25 a 44 anos. Os homes son máis proclives a sufrir accidentes entre os 16 e os 42 anos, mentres que as mulleres superan a sinistralidade media a partir dos 45 anos. Só ata os 25 anos prodúcense o 36,65% dos accidentes domésticos.  

LUGAR E HORA DO ACCIDENTE  

En 2011, o interior do fogar continuou sendo o lugar onde máis se suceden principalmente os accidentes definidos como DADO, aglutinando case o 54,5% destes contratempos. Séguenlle a área de transporte e a deportiva cun 13,2% e un 9,5% dos accidentes respectivamente. Os tramos horarios das 9.00 a 12.00, e de 17.00 a 20.00, son os de maior número de sinistros, aglutinando practicamente 1 de cada 3 accidentes respectivamente. Só o 3,97% dos que sufriron un accidente doméstico ou durante actividades de lecer requiriron ingreso hospitalario.  

ACCIDENTES SEGUNDO ACTIVIDADE

A actividade desenvolvida no momento do accidente está condicionada polas variables de xénero e idade. A actividade doméstica incide máis entre as mulleres e sobre todo entre aquelas que teñen de 45 anos en diante. O desenvolvemento de xogos e o tempo libre orixinan un número máis elevado de sinistros entre os homes e de 15 a 24 anos.  

TIPO DE LESIÓNS

As caídas xeran a maioría dos sinistros (51,1%). Séguenlles os golpes e choques, así como os cortes e esmagamentos, cun 16,6% e un 14,2% do total, respectivamente. Os efectos de produtos térmicos sitúanse en terceiro lugar cun 9,2% do total de accidentes. As contusións e mazaduras son o tipo de lesión máis frecuente en menores de 1 ano e en persoas maiores, incidindo en maior medida en mulleres. Entre a mocidade de 5 a 24 anos, as lesións máis comúns son as distorsións, torceduras ou escordaduras, as feridas abertas e as contusións e mazaduras. As distorsións, torceduras e escordaduras son lesións menos comúns a medida que aumenta a idade, mentres que as fracturas teñen unha tendencia crecente.  

PRODUTOS CAUSANTES

Os nenos magóanse en accidentes onde están implicados xoguetes, roupa, mobiliario, outras persoas e a comida/bebida. Entre 5 e 24 anos son en maior medida o propio ser humano e o balón, ademais da bicicleta. Entre 25 e 44 obsérvanse cambios nos produtos implicados sendo os máis relevantes os aparellos de uso doméstico 17,2% e principalmente o coitelo de cociña. Para os de 45 a 65 anos, os maiores inimigos son as escaleiras e a auga, como elemento natural. Por último, para as persoas de maior idade, á parte de todos os demais causantes anteriores aparecen implicados os equipos exteriores e as superficies transformadas, xa que o 45,6% dos maiores de 65 anos sofren lesións a causa do chan. Este estudo abre un novo apartado que contempla o tratamento médico, duración, gravidade da lesión e medicamentos que toma o accidentado. Nel obsérvase que o 87,5 dos accidentados recibiu algún tipo de tratamento como consecuencia do sinistro e a súa duración media foi de 18 días. A metade dos hospitalizados tivo que ser sometido a unha intervención cirúrxica.