Poderán acceder ao procedemento extraordinario de recoñecemento de grao do sistema transitorio da progresión na carreira administrativa, de conformidade co establecido na base 7 do acordo, o persoal que cumpra os seguintes requisitos:

a) Estar incluído no ámbito de aplicación definido na base 2 do acordo para a implantación do sistema transitorio de recoñecemento da progresión na carreira administrativa do Concello da Coruña aprobado mediante acordo da Xunta de Goberno Local na sesión do 12/04/2023 (BOP núm. 73 do 18/04/2023).

b) Estar en situación de servizo activo no Concello da Coruña ou servizos especiais desempeñando un posto de traballo ou cargo no Concello da Coruña, ou en calquera outra situación administrativa que supoña reserva de praza no prazo de presentación de solicitudes.

c) Ter a condición de persoal funcionario ou laboral deste Concello a 31/12/2025.

d) Presentar a solicitude de recoñecemento de grao no prazo e segundo o procedemento electrónico establecido nesta convocatoria.

e) Obter unha avaliación favorable cunha puntuación mínima de 4 puntos segundo o baremo establecido na base 4.4 apartados a), b), c), d), e), f) e g) do acordo do sistema transitorio de recoñecemento da progresión na carreira administrativa do persoal do Concello da Coruña

f) Cumprir os seguintes requisitos de permanencia desde a toma de posesión no Concello da Coruña na mesma escala, subescala, clase e grupo/subgrupo de clasificación profesional no que se solicita o recoñecemento de grao:

− Para o acceso ao grao inicial e grao I: 5 anos de antigüidade a 31/12/2025.

− Para o acceso ao grao II: 10 anos de antigüidade a 31/12/2025.

− Para o acceso ao grao III: 15 anos de antigüidade a 31/12/2025.

− Para o acceso ao grao IV: 20 anos de antigüidade a 31/12/2025.

Para os efectos de completar o período de permanencia en cada grao, computarase o tempo transcorrido na situación de servizo activo ou en calquera outra situación administrativa que supoña reserva de praza na mesma escala, subescala, clase e grupo/subgrupo de clasificación profesional.

O desempeño de postos de traballo con xornadas de traballo inferiores á común, non afectará ao cómputo do tempo de servizos prestados, sen prexuízo da redución do complemento que lles corresponda na porcentaxe de redución de xornada.