Co obxecto de guiar as persoas con intencións de emprender o seu propio negocio, a Fundación Novacaixagalicia inaugurou onte a Escola de Emprendedores. Este proxecto, financiado con fondos europeos do plan Urbana C, foi impulsado dende o Concello co obxecto de contribuír ao desenvolvemento da economía local. «En principio, tiñamos a intención de investir en ladrillo, pero logo resultaba inviable e creo que xa temos moito», sinalou a concelleira de Emprego María Luisa Cid.

«Démoslle moitas voltas a cómo investir ese diñeiro e cremos que esta é unha das mellores. Porque non se trata de facer uns cursos, senón dunha formación a grande escala», explicou Cid que subliñou que, desta maneira, «un bo máster está ao alcance de calquera». Nese sentido, cabe sinalar que se trata dunha actividade gratuíta para as 17 persoas que o iniciaron.

A Escola de Emprendedores impartirá durante o 2014 e de forma gratuíta 1.830 horas de formación. Os cursos, seminarios e conferencias están dirixidos a emprendedores da Agra do Orzán, tanto desempregados como persoas con traballo que desexen mellorar o seu futuro profesional, e hai distintos formatos e niveis, dende os máis básicos ata os moi complexos, pero todos cun gran nivel de esixencia.

Os emprendedores dispoñerán en todo momento da axuda de mentores e coachers que lles farán un seguimento personalizado, analizando as súas capacidades. Ademais, a diferenza doutras escolas, na Escola de Emprendedores non son os alumnos os que elixen qué curso facer, xa que é o propio centro o que decide qué programa formativo deben realizar en función dos seus perfís.

Fonte: La Voz de Galicia