O Concello acometerá nas vindeiras semanas os traballos de substitución das tarimas de madeira existentes na praza da fonte de Santa Catalina, superficies que está previsto adecuar coa disposición de novas lousas de pedra.

Actualmente, na praza da fonte de Santa Catalina hai dúas zonas con pavimento de listóns de madeira, deterioradas pola súa exposición ás inclemencias meteorolóxicas. A progresiva erosión dos listóns derivou, co paso do tempo, nun risco para a seguridade das e dos peóns, polo índice de escorregamento da superficie en días de choiva ou humidade.

Por este motivo, o Goberno de Inés Rey daralle resposta ás solicitudes da cidadanía mudando o firme de madeira por un enlousado de pedra, que contribuirá tamén á mellora da estética xeral da praza. Neste sentido, cómpre lembrar que na intervención está previsto respectar as ablaqueacións existentes, así como os seus bordos perimetrais.

Esta medida complementa ás obras de reurbanización de San Andrés postas en marcha este mesma semana polo Goberno de Inés Rey, que convertirán a rúa nun bulevar con 80 moreiras, recuperando a súa configuración orixinal.