O Aquarium Finisterrae abre a reserva de entradas para as sesións de maio e xuño de 2026 da actividade «Aventura coas focas».

Trátase dun obradoiro de divulgación científica para coñecer de primeira man a rutina diaria das focas que viven nas piscinas exteriores. Durante os 90 minutos que ocupa a actividade, participarase na preparación dos alimentos e accederase ás plataformas exteriores, onde se alimenta e revisa o estado destes mamíferos mariños.

A actividade está dirixida a persoas maiores de 7 anos, que deberán acreditar a súa idade con DNI ou fotografía do libro de familia onde figuren o nome e a data de nacemento. Os nenos e nenas deberán ir acompañados durante toda a actividade por unha persoa adulta, que se fará cargo dun máximo de dous menores.

Esta actividade non ten custo engadido ao prezo que cada visitante deba aboar para entrar no recinto pero require a reserva de entradas para todas as persoas participantes, que se poderá realizar partir do luns 11 de maio, ás 9 da mañá nesta ligazón.

As entradas pagaranse no momento de chegar á actividade, na recepción do Aquarium. Polas características da actividade, ofértanse só 12 prazas en cada sesión.