O sábado 6 de xuño ás 12.30 h a Biblioteca Municipal Ágora acolle a charla divulgativa "O barrio, o ruído, o zen e o zazen", un encontro para presentar á veciñanza un novo espazo dedicado á práctica do Budismo Zen e a meditación zazen.

Daniel Ungo, mestre zen da liñaxe Deshimaru, funda no barrio do Ventorrillo un Dōjō para a práctica do zen e a meditación zazen nas galerías da Ronda de Outeiro.

Nesta charla dará a coñecer o Dōjō á veciñanza, así como tamén amosará en que consiste o budismo zen e a práctica da meditación zazen.

Sobre o mestre zen Daniel Ungo

Daniel Ungo atopa a Vía do Buda no ano 2001 a través dunha iniciación no Mokusan Dōjō de Madrid. Constantemente presente na práctica cotiá do Dōjō así como nas sesshin (retiros) do templo Shorin-ji en La Vera (Cáceres) baixo a educación da súa mestra Bárbara Kosen, de quen recibiu a ordenación de Bodhisattva (practicante zen laico) en 2007, a ordenación de monxe zen en 2008 e a transmisión do Dharma Shiho) en 2023, sendo actualmente mestro zen da liñaxe Deshimaru.

No ano 2021 trasládase a Galicia, onde crea varios centros ata que, en 2026 instálase na Coruña e pon en marcha o Dōjō Ryu-Sansui,  novo centro estratéxico desde o cal expandir a práctica de Zazen en Galicia.