"Queren encher a Galicia

de industrias contaminantes

e que o noso povo siga

a producir emigrantes."

Estrofa da Cantiga das Encrobas, de Manuel María

O elevado prezo do cobre no mercado anima a súa procura. As empresas Cobre S.Rafael e Atalaia Mining, que ten case o monopolio do negocio do cobre no Estado, pretenden reabrir a mina de cobre en Touro e O Pino; este proxecto non inclúe sequera un plan de restauración.

Sabemos que mina de Touro abandonada en 1986 aínda contamina os acuíferos, regatos e ríos que aflúen no Ulla e da Ría de Arousa. Quen se responsabiliza dos seus efectos na saúde, na economía?

Sabemos o que pasou hai vinte anos coas balsas de tóxicos en Aznalcóllar.

A promesa de postos de traballo para a nova explotación da mina (durante 13 anos) debe valorarse tendo en conta que as voaduras diarias con toneladas de explosivos, o uso de substancias nocivas, as balsas de lodos tóxicos etc. suporían a destrución das empresas da comarca (explotacións gandeiras, agrícolas,turísticas) que ocupan a tantas ou máis persoas, cun emprego máis diversificado e sostíbel a longo prazo.

Durante 55 minutos veremos o documentario dirixido e realizado por Xosé Bocixa (autor de "As Encrobas A ceo aberto", "Rosa de Corcoesto"...) e producido por Tingalaranga Audiovisual en colaboración con Nós Tv, en que ouviremos as voces científicas, da veciñanza, alcaldes e empresariado sobre o proxecto da mina en Touro e O Pino.

Logo faremos un debate xunto co director do documentario, membros da Plataforma Veciñal Mina Touro-O Pino NON, un representante de Nós Tv.