A Sala Municipal de Exposicións Salvador de Madariaga acolle desde este xoves a exposición fotográfica 'Virando o rosa', da fotógrafa documental Diana Fajardo. Un proxecto que pon no centro as experiencias das mulleres diagnosticadas de cancro de mama e cuestiona os estereotipos arredor desta enfermidade desde unha perspectiva de xénero. A inauguración contou coa presenza da alcaldesa da Coruña, Inés Rey, xunto coa deputada provincial, Avia Veira -institución que concedeu o VII Premio Luísa Villalta a Proxectos pola Igualdade a Diana Fajardo e Dolores Vázquez, responsables da iniciativa-; e Concepción Gómez Ruso (Conchi), participante no proxecto.

Durante a súa intervención, Rey sinalou que Virando o rosa "non é só unha exposición, é unha invitación a mirar doutro xeito e a virar a perspectiva coa que durante tanto tempo se falou do cancro de mama". A alcaldesa subliñou tamén a importancia de dar voz ás propias protagonistas e destacou o papel da cultura como ferramenta de transformación social e a relevancia da perspectiva feminista na creación artística: "A ollada feminista serve para nomear o que non se dicía e para facer visible o que antes quedaba nas marxes", afirmou.

Rey incidiu ademais na metáfora que dá título á exposición e que invita a revisar a forma na que a sociedade mira o cancro de mama: "Esta exposición invítanos a facer algo distinto: a poñernos esas lentes moradas e mirar o rosa de fronte, sen ocultar a dor nin as contradicións, pero tamén sen renunciar á dignidade e á verdade das mulleres que protagonizan estas historias". A alcaldesa agradeceu o traballo de Diana Fajardo e a xenerosidade das mulleres participantes no proxecto, destacando que "compartir a propia historia non sempre é doado, pero cando se fai convértese nun acto de xenerosidade e tamén nun acto profundamente político: o de dicir que a nosa experiencia tamén conta".

'Virando o rosa', dispoñible para visita ate o 25 de marzo

Virando o rosa pode visitarse na Sala Municipal de Exposicións Salvador de Madariaga (rúa Durán Loriga, 10) desde o 5 de marzo ata o 25 de marzo, con entrada libre.

A mostra parte dun traballo de investigación e entrevistas a máis de trinta mulleres da provincia da Coruña e articúlase arredor dunha serie de retratos e testemuños que amosan diferentes momentos e formas de afrontar a enfermidade. O proxecto complétase cun libro gráfico e encontros públicos nos que participan as propias protagonistas.

A exposición forma parte dun proxecto artístico e social que busca abrir unha reflexión colectiva sobre como se vive e se conta o cancro de mama e sobre a necesidade de escoitar as voces das mulleres que atravesan esta experiencia.