O Concello despregou hoxe un operativo a grande escala para proceder a limpar as praias e os barrios tras as celebracións da noite de San Xoán deste ano. Segundo observaron os servizos, a cantidade total de residuos recollidos diminuíu nun 50%, o que, apuntou a alcaldesa, Inés Rey, "é un claro síntoma de que a cidadanía cada vez está máis concienciada, e de que se divirte dunha forma cada vez máis responsable. Quero felicitar a todas as persoas que fixeron as cousas ben e demostraron que desfrutar da festa non impide manter unha actitude cívica e responsable". O número de toneladas de residuos retiradas nas praias foi de 22,76 fronte ás 44 no ano pasado, no que tamén caera o volume de residuos con respecto ao anterior exercicio. 

Ademais, a zona do proxecto piloto na que se reservaron parcelas en Riazor para entidades coa condición de que estas se fixesen responsables de recoller os seus propios residuos resultou, segundo valorou a alcaldesa, "un éxito", xa que estas zonas quedaron substancialmente máis limpas que o resto de lugares dos areais onde se fixeron fogueiras. 

"Unha vez máis, a maioría dos coruñeses e coruñesas demostraron sentido da responsabilidade e concienciación co coidado da cidade, tamén nas datas sinaladas. Non obstante, imos seguir pelexando por unha festa cada vez máis limpa, sendo conscientes de que é imposible alcanzar os residuos cero, aínda que só sexa polos restos das fogueiras, que sempre estarán aí. Tamén lles agradecemos ás 55 entidades do plan piloto de parcelas o seu comportamento exemplar. Na súa zona, os residuos recollidos foron practicamente cero. Todas e todos xuntos, imos polo bo camiño", rematou a alcaldesa.

A redución dos residuos responde tamén ás campañas de concienciación levadas a cabo polo Concello nos últimos meses. Rey recordou que o residuo cero é imposible porque sempre se retirarán os restos das lumeiradas coa achega de area correspondente. "Mais o noso obxectivo é que esa sexa a única cifra de residuos que compute", dixo a alcaldesa, que lles agradeceu aos coruñeses e ás coruñesas, unha vez máis, un comportamento exemplar nunha noite sen incidencias destacables e que foi a máis limpa en décadas malia ser tamén das máis concorridas. 

Menos intoxicacións etílicas

A noite de San Xoán reuniu máis de 200.000 persoas entre os areais e os barrios, un despregamento que para o Concello supuxo un reto de seguridade e loxístico, e ao que se respondeu coa creación dun operativo de máis de 1.000 persoas entre servizos de emerxencias e persoal de limpeza. O dispositivo preventivo organizado polos servizos sanitarios rexistrou un total de 174 asistencias e 28 traslados hospitalarios, segundo o balance dos propios efectivos.

"O labor de todos os efectivos que se mobilizaron como parte do operativo de San Xoán foi fundamental. Cada ano achegámonos máis a ter unha celebración máis limpa e con menos accidentes, e para iso é fundamental o persoal profesional que, en nome do Concello, coida da cidade e da cidadanía", valorou a alcaldesa, Inés Rey. 

Entre as principais tipoloxías asistenciais, destacan as queimaduras (56), as feridas e laceracións (32), as intervencións relacionadas co servizo de salvamento e socorrismo (30), as intoxicacións etílicas (25), os accidentes e traumatismos (19) e as limpezas oculares (11). 

A distribución das asistencias foi de 79 homes (45,4%) e 95 mulleres (54,6%). Por puntos de atención, o Posto Sanitario Avanzado foi o que rexistrou máis actividade, con 119 asistencias, seguido do posto do Orzán, con 30, e do posto de Riazor, con 25. A franxa horaria de maior actividade foi entre as 1.00 e as 3.00 horas. En canto ao punto violeta, atendeuse un total de 1.011 persoas, das cales 624 foron mulleres (61,7%) e 387 homes (38,3%). 

O número total de incidencias mantense en cifras similares ás do ano pasado, cun leve aumento de atencións por queimaduras e un descenso significativo (-25%) das atencións por intoxicación etílica.