O concelleiro de Cultura e Turismo, Gonzalo Castro, participou hoxe na presentación do concerto Yandel Sinfónico, un espectáculo que reunirá este domingo 12 de xullo, ás 22.00 horas, no Coliseum, ao artista portorriqueño Yandel e á Orquestra Gaos, nunha proposta musical inédita en Galicia. No acto tamén participaron Belén do Campo, delegada da Xunta na Coruña, Raúl Andrade, presidente da Orquestra Gaos, e Antonio Casal, director de Quireza Events.

O concerto supón a fusión de dous universos musicais diferentes, combinando os grandes éxitos dun dos artistas máis recoñecidos da música urbana internacional coa forza e riqueza sonora dunha gran formación sinfónica. A Coruña será a única cidade galega que acolla esta produción.

Durante a presentación, Gonzalo Castro destacou o carácter singular da proposta e a relevancia da participación da Orquestra Gaos. "É un evento moi especial e singular, unha simbiose entre tradición e modernidade moi propia da nosa cidade, que sen esquecer de onde vén camiñou continuamente no ámbito cultural cara á modernidade", sinalou o edil.

Castro subliñou ademais o valor engadido que supón contar cunha formación nacida na cidade para un espectáculo destas características. "A presenza da Orquestra Gaos converte este concerto nun motivo de orgullo para A Coruña. Falamos dunha entidade cultural que leva anos formando novas xeracións de músicos, difundindo o patrimonio musical galego e achegando a música sinfónica a novos públicos", indicou.

Fundada na Coruña en 2009 e dirixida por Fernando Briones, a Orquestra Gaos consolidouse como un dos proxectos musicais máis relevantes de Galicia. Ao longo da súa traxectoria reuniu máis de 450 músicos de todo o país e desenvolveu máis de 80 concertos, combinando repertorio clásico, música galega, proxectos educativos, propostas corais e colaboracións multidisciplinares.

A agrupación destaca tamén pola súa dimensión social e formativa, cun modelo aberto que aposta pola incorporación de novos talentos, a democratización da música clásica e a difusión da cultura galega entre públicos diversos. A súa actividade contribuíu de forma significativa a reforzar o papel da Coruña como un dos principais centros musicais do noroeste peninsular.

Neste contexto, o concerto de Yandel representa unha nova oportunidade para amosar a versatilidade e capacidade artística da formación coruñesa. A través dos seus arranxos sinfónicos, a Orquestra Gaos achegará unha nova dimensión ao repertorio do artista portorriqueño, protagonizando unha experiencia musical única que combina innovación, excelencia artística e vocación de chegar a públicos moi diversos.

Desde o Goberno de Inés Rey valórase especialmente a celebración de eventos capaces de tender pontes entre distintos estilos musicais e xeracións, ao tempo que proxectan o talento cultural local en producións de grande formato. Neste sentido, a participación da Orquestra Gaos constitúe un dos elementos diferenciais dunha cita chamada a converterse nun dos grandes acontecementos musicais deste verán na cidade.