A artista Lúa Mosquetera levará a súa poesías ao escenario do Teatro Colón o vindeiro venres 11 de xullo. Mosquetera ofrecerá un recital de poesía no que "duran máis as presentacións dos poemas que os propios poemas", en palabras da propia escritora. "Desde o Goberno de Inés Rey estamos comprometidos co talento local e buscamos que as nosas artistas máis destacadas poidan expoñer o seu traballo nos principais recintos culturais da cidade", sinalou Gonzalo Castro.

A personalidade de Lúa en escena é irresistible e á vez próxima. A súa poesía sensible, belixerante, certeira. Ela recita o seu particular "spoken word", unha disciplina a medio camiño entre o rap e a poesía oral, mentres o músico Pablo Seijas acompáñaa con pezas musicais creadas para cada poema nunha simbiose emocionante.

Lúa Mosquetera é unha escritora, poeta e artista multidisciplinar galega nacida en Miño en 1988. Graduada en Lingua e Literatura Galegas pola Universidade de Santiago de Compostela, destaca pola súa voz poética potente, comprometida e profundamente emocional, que combina a poesía con elementos escénicos e musicais.

Mosquetera iniciou a súa carreira literaria coa autoedición de dous poemarios: Rasrás (2018) e Aunque seas rara y seas pájaro (2020). En 2022 publicou Espíderman coa editorial Galaxia, obra que inclúe o poema «Anorak de pel de caribú», gañador do premio ARitmar á Mellor Poesía da Galiza 2021. Ese mesmo ano, proclamouse campioa do Poetry Slam de Compostela e foi finalista no campionato estatal.

En 2022 tamén publicou a súa primeira novela, ¡Yo vivo! (La Moderna), unha obra que aborda temas como a perda, a precariedade e a identidade feminina desde unha perspectiva xeracional e intimista. A protagonista é unha libreira de 38 anos que reflexiona sobre a súa vida, marcada pola enfermidade da súa nai e as presións sociais contemporáneas.