O Concello da Coruña participou este sábado na ofrenda floral celebrada con motivo do centenario do busto de Eduardo Pondal, situado nos xardíns de Méndez Núñez. O concelleiro de Cultura, Gonzalo Castro, asistiu ao acto en representación da corporación municipal.

A homenaxe foi organizada polo Circo de Artesáns, entidade promotora do monumento inaugurado en 1925, que desde entón forma parte do espazo público coruñés como recordo á figura do poeta de Ponteceso. O busto de Pondal foi o primeiro erguido na cidade en honra dun autor galego.

Durante a súa intervención, o concelleiro destacou a vixencia do pensamento pondaliano e o seu vínculo coa cidade: "Este busto lembra o máis coruñés, o máis atlántico dos Pais do noso País". Castro anunciou ademais que o Concello impulsará unha homenaxe nacional ao dramaturgo coruñés Manel Lourenzo, recentemente falecido, como recoñecemento ao seu legado e ao seu compromiso coa palabra como ferramenta de liberdade.

O Goberno de Inés Rey agradece ás entidades organizadoras a celebración deste acto e reafirma o seu compromiso coa defensa da lingua e da cultura galegas, así como coa promoción dunha memoria histórica viva, que se proxecte cara ao futuro desde os valores da identidade e da cohesión social.