O concelleiro de Economía e Planificación Estratéxica, e voceiro do Goberno municipal, José Manuel Lage, fixo fincapé hoxe na necesidade de sustentar a política metropolitana entre A Coruña e os municipios da área "priorizando os servizos á cidadanía, con fórmulas de cooperación entre concellos".

O edil presidiu esta mañá a Comisión Informativa Especial creada para abordar este eido, co obxectivo de plantexar e activar ferramentas eficaces de coordinación e xestión, atendendo a factores como os fluxos diarios de mobilidade, o mercado de traballo, a localización empresarial, os equipamentos, a vivenda e as dinámicas económicas que transcenden, desde hai décadas, aos límites administrativos municipais.

Na reunión de hoxe, celebrada no Palacio Municipal de María Pita, Lage defendeu a cooperación voluntaria, a prestación compartida de servizos, a planificación conxunta e a construción progresiva de confianza entre municipios como os catro eixos clave para avanzar na liña doutras iniciativas previas que obtiveron bos resultados, como a área Metropolitana de Barcelona.

Lage lembrou que "máis do 80% das relacións funcionais entre os municipios da área materialízanse diariamente mediante desprazamentos por motivos laborais, educativos ou de acceso a servizos". Con todo, o sistema actual continúa fragmentado entre transporte urbano e interurbano, operadores distintos e competencias administrativas separadas. Por iso, o edil defendeu a creación do Consorcio Metropolitano de Transportes da área da Coruña -non entendido como unha nova administración política, senón como un organismo de cooperación participado-, que o Concello plantexa coa finalidade de propiciar a planificación conxunta do transporte público, coordinar as liñas urbanas e interurbanas e camiñar na senda dunha integración tarifaria.

Unha visión compartida do territorio

Na sesión desta mañá, os grupos políticos municipais acordaron ter un calendario de traballo entre setembro e marzo do 2027 para formular propostas que axuden a conformar a proposta da Coruña con todos os concellos limítrofes, integrando aspectos e cuestións que van máis alá da mobilidade en si mesma.

"Cada municipio continúa planificando de forma independente cuestións que afectan ao conxunto da área. O que entendemos é que este documento axudaría a superar a competencia entre municipios mediante unha visión compartida do territorio", dixo Lage, que apuntou que, a súa elaboración tamén permitiría acceder con máis facilidade a financiación a través de fondos da Unión Europea.

Isto é o que, según o edil, abriría camiño a un Marco Metropolitano de Planificación Territorial que simplificaría a localización de novos desenvolvementos empresariais, a coordinación de grandes bolsas de vivenda, a protección de espazos ambientais, a ordenación das áreas loxísticas e a coordinación dos grandes equipamentos.

Desenvolver infraestruturas metropolitanas compartidas

Na sesión desta mañá, Lage instou a que todos os concellos da Gran Coruña traballen xuntos para definir e desenvolver infraestruturas compartidas, cunha rede metropolitana de aparcamentos disuasorios, unha rede ciclista intermunicipal, corredores verdes, unha plataforma dixital única de mobilidade, a coordinación de infraestruturas hidráulicas e a coordinación de redes de saneamento e abastecemento.

"A competencia xa non se produce entre municipios veciños. Prodúcese entre áreas metropolitanas. Por iso A Coruña debe presentarse cara ao exterior como un único espazo económico de aproximadamente 450.000 habitantes, con capacidade para atraer investimento, talento e empresas. Unha estratexia conxunta multiplica a capacidade de captación de investimentos nacionais e europeos", recalcou Lage.

O edil indicou que, en todo caso, este proxecto pasa por construír unha identidade metropolitana compartida: "Non se trata de diluír a identidade de cada municipio, senón de reforzar unha identidade complementaria. Barcelona amosa que é posible manter identidades municipais fortes e, simultaneamente, desenvolver unha visión metropolitana compartida. A futura da área metropolitana da Coruña non depende de crear unha nova administración, senón de crear unha nova forma de cooperar".