O Concello da Coruña renderá homenaxe o vindeiro martes 10 de xuño ao artista coruñés Tono Correa Corredoira. "Desde o Goberno de Inés Rey queremos que os nosos artistas máis destacados sexan recoñecidos pola cidadanía e coñezan de primeira man a súa obra, por iso promovemos este acto de homenaxe nun dos espazos culturais máis importantes de Galicia", indicou Gonzalo Castro, concelleiro de Cultura e Turismo.

O acto comezará ás 20.00 horas e a entrada será libre ata completar capacidade. Ademais, todas as persoas que asistan recibirán como agasallo unha obra gráfica do propio autor. O acto contará cun acompañamento musical e será presentado por Víctor Barús. Proxectarase o documental 'A Caverna dos Soños', dirixido por Javier Sega, Víctor Barús e Jerl. Tamén participarán no acto o escritor Francisco Fernández Naval e a poeta, escritora e xornalista, Eva Veiga.

Tono Correa Corredoira, nado na Coruña en 1952, é un artista galego multidisciplinar recoñecido pola súa traxectoria como pintor, escultor, gravador, ceramista e muralista. Comezou a súa carreira artística nos anos 70, tras abandonar os estudos de Arquitectura e Belas Artes para dedicarse plenamente á creación artística. Foi membro fundador dos colectivos A Galga e GrupOrzán, e participou activamente no movemento Atlántica, clave na renovación da arte galega contemporánea. 

A súa obra caracterízase por unha figuración expresionista que aborda temas como a maternidade, o erotismo, os mitos clásicos e o mar. Entre as súas creacións máis emblemáticas destaca o mural '27 golfiños e unha estrela' (1992), situado na praia de Santa Cristina, en Oleiros, realizado en vitrocerámica. Tamén é autor da 'Rosa dos Ventos' (1994), o mosaico no parque escultórico da Torre de Hércules.

En 2017, a Fundación Luis Seoane dedicoulle a exposición retrospectiva 'Os días pintados', que reuniu case un centenar de obras e consolidou a súa posición como figura fundamental na arte galega das últimas décadas. Correa Corredoira tamén ten desenvolvido unha destacada actividade como ilustrador e poeta, e continúa a ser unha voz activa na defensa do patrimonio artístico e cultural de Galicia.