O Planetario da Casa das Ciencias estrea mañá, ás 19.00 horas, Nas ás da noite, un documental sobre as migracións das aves, que desde este domingo pasará a formar parte da programación, con proxeccións os sábados, domingos e festivos ás 13.00 e 18.00 horas. A obra, recomendada a partires dos 12 anos, desenvólvese en varias escenas que percorren a historia do coñecemento das viaxes migratorias, os mecanismos que empregan as aves para guiarse ou a íntima relación dalgunhas delas co firmamento nocturno.

A produción combina  animacións dixitais e secuencias en vídeo a toda cúpula, gravadas en diversos espazos naturais de Europa, desde os fiordes noruegueses ou os pantanos de Diepholz, en Alemania, ata os principais humidais da península ibérica.

O proxecto, que está financiado pola convocatoria de axudas para o fomento da cultura científica, tecnolóxica e da innovación 2014, foi producido polos Museos Científicos Coruñeses, o Planetario de Pamplona e o Parc Astronòmic Montsec Ager, en Lleida
, e contou coa participación de media ducia de museos científicos do Estado e do Exploratorio–Centro Ciência Viva de Coimbra (Portugal) e o Museum am Schölerberg Planetarium de Osnabrück, Alemania.