Que sabemos sobre a orixe, a evolución e o destino final do Universo? E sobre os ingredientes que o compoñen? Como sabemos todo isto?

Nesta conferencia Antón Baleato, astrofísico do Berkeley Center for Cosmological Physics, fará unha introdución aos principais achados da cosmoloxía moderna. Tamén describirá os principais interrogantes que ocupan ás cosmólogas e cosmólogos na actualidade, e mostrará os potentes telescopios e sofisticadas técnicas que se están empregando, como a lentificación gravitacional, unha prometedora xanela ao universo invisible.

O coruñés Antón Baleato Lizancos estudou Física Aplicada na Universidade de Columbia (Nova York) e realizou o seu doutoramento en Cosmoloxía na Universidade de Cambridge (Reino Unido). A súa tese leva por título Polishing the Lenses: Precise Modelling of Gravitational Lensing and Delensing of the Cosmic Microwave Background. Actualmente traballa como postdoutorado no Berkeley Center for Cosmological Physics (UC Berkeley & Lawrence Berkeley National Laboratory, CA).