O Aquarium Finisterrae abre a reserva de entradas para as sesións do primeiro trimestre de 2025 da actividade "Aventura coas focas".

Trátase dun taller de divulgación científica para coñecer de primeira man a rutina diaria das focas que viven nas piscinas exteriores. Durante os 90 minutos que ocupa a actividade participarase na preparación dos alimentos e accederase ás plataformas exteriores onde se alimentan e de revisa o estado destes mamíferos mariños.

A actividade está dirixida a persoas maiores de 7 anos, que deberán acreditar a súa idade con DNI ou fotografía do libro de familia onde figure o nome e a data de nacemento. Os nenos e as nenas deberán ir acompañados durante toda a actividade por unha persoa adulta que se fará cargo dun máximo de 2 menores.

Esta actividade non ten custo engadido ao prezo que cada visitante deba pagar para entrar no recinto, pero require a reserva de entradas para todas as persoas participantes, que se poderán reservar a partir do xoves 9 de xaneiro ás 9.00 da mañá.

As entradas aboaranse no momento de chegar á actividade, na recepción do Aquarium. Polas características da actividade, ofértanse só 12 prazas en cada sesión.