A cuarta edición do programa municipal Cinema na Escola celebra a súa gala final, para a categoría de Educación Primaria, o martes 19 de maio, a partir das 17:00 horas, no Centro Sociocultural Ágora.

Na gala, que contará coa presenza do Concelleiro de Educación, Formación e Innovación Tecnolóxica, Juan Ignacio Borrego, serán proxectados fragmentos dos curtos finalistas, desvelados os grupos gañadores e, finalmente, entregados os premios correspondentes (mellor curtametraxe, interpretación, guion, fotografía, efectos visuais, edición e montaxe, e edición de audio).

Como en edicións anteriores do programa, o público poderá votar ao que considera a mellor curtametraxe de cada unha das categorías (Primaria e ESO). Para iso, xa se poden visualizar os 18 curtos presentados nesta edición (9 de Educación primaria e 9 de ESO) na canle de YouTube de Educación do Concello da Coruña.

Para determinar os curtos gañadores do premio do público na categoría de Educación Primaria, teranse en conta as estatísticas de reproducións, likes e retencións entre o xoves 14 de maio ás 12:00 horas e o martes 19 de maio ás 12:00 horas.

Grupos participantes na categoría de Educación Primaria

• CEIP Alborada, co curto "Toc, toc".
• CEIP Alborada, co curto "Adeus".
• CEIP Curros Enríquez, co curto "A pizarra".
• CEIP Curros Enríquez, co curto "Rachando o telón".
• CEIP José Cornide, co curto "O pozo dos desexos".
• CEIP Ramón de la Sagra, co curto "O chichón do pasado".
• CEIP Sagrada Familia, co curto "O aprendiz".
• CEIP Zalaeta, co curto "Canto medraches!".
• CPR Cid, co curto "Zona 0".