O Día da Ciencia na Rúa cumpre 30 edicións e, nesta ocasión, debido ás obras de remodelación que se están realizando no Parque de Santa Margarita, a actividade trasládase aos xardíns de Méndez Núñez, con 54 jaimas nas que alumnado, profesorado e persoal de centros educativos, institucións científicas e centros universitarios despregarán o seu programa de actividades para todos os públicos.

Ademais, nos soportais da Casa das Ciencias desenvolveranse tamén actividades paralelas ofrecidas pola Agrupación Astronómica Coruñesa Ío, a Asociación Galega de Xadrecistas-AGAX, Bricolabs, Incude (Iniciativas Culturais e Deportivas universitarias), e un taller de papiroflexia.

Os Museos Científicos Coruñeses celebran este día cunha xornada de portas abertas nos seus tres centros, a Casa das Ciencias, a Domus e o Aquarium Finisterrae, en horario de 10 a 19 horas (último acceso ás 18 horas no Aquarium, ás 18.30 horas en casa das Ciencias e Domus).

A visita ás salas de exposición da Casa das Ciencias será libre, sen reserva previa, pero para asistir a unha sesión de Planetario hai que retirar invitacións, que estarán dispoñibles a partir das 9 horas do 8 de maio nesta ligazón.

A visita á Domus será libre, sen reserva previa, pero o acceso a MiniDomus, o novo espazo para nenos e nenas de ata 6 anos acompañados de polo menos unha persoa adulta, esixirá a realización dunha reserva previa que poderá facerse desde as 9 horas do 6 de maio nesta ligazón.

Para visitar o Aquarium Finisterrae será imprescindible realizar unha reserva de entradas, que poderá facerse cun máximo de 3 días de antelación nesta ligazón.

Para facilitar o acceso ás persoas maiores de 65 anos, estas poderán acceder sen reserva.

Pode consultarse o programa do Día da Ciencia na Rúa descargando o PDF interactivo adxunto no recuadro superior desta páxina.