A xornada de portas abertas Estudios Abertos, organizada polo Concello, celebrarase este ano os días 6 e 7 de xuño, ampliando a súa duración nun día. "A nosa alcaldesa, Inés Rey, amosa deste xeito o seu compromiso cos creadores e creadoras da cidade, ofrecendo ademais á cidadanía unha maior facilidade para coñecer os seus traballos", indicou o concelleiro de Cultura e Turismo, Gonzalo Castro.

Este ano aumenta tamén o número de espazos artísticos que participan, pasando de 39 a 55. "Desde o Goberno de Inés Rey buscamos dinamizar as artes plásticas da cidade e poñer en valor aos nosos creadores e creadoras con esta iniciativa, que permitirá á cidadanía coñecer e visitar numerosos espazos creativos dos barrios", apuntou Gonzalo Castro. 

As xornadas terán lugar o sábado 6 e o domingo 7 de xuño, e os horarios irán desde as 10.00 ata as 22.00 horas, en función do espazo. Participarán profesionais das diferentes artísticas: escultura, pintura, fotografía, ilustración, debuxo, cerámica ou multidisciplinar. O acceso para a cidadanía é gratuíto e os estudios contarán con programación propia durante ambas xornadas, que incluirá a participación de artistas convidados e outras sorpresas. "Os diferentes espazos nos que terá lugar estas xornadas estarán espallados pola cidade, permitíndolle aos asistentes facer unha ruta percorrendo a cidade e seleccionar aqueles que máis lle interesen", indicou Castro.

O obxectivo destas xornadas é coñecer de primeira man os artistas coruñeses, os seus centros de traballo e creación e os seus procesos creativos. Son todos eles e elas profesionais radicados na cidade e que desenvolven o seu traballo nela. "Estudios Abertos é a oportunidade perfecta para coñecer a artistas de diferentes disciplinas e o seu traballo", sinalou o concelleiro.

O detalle de todas as actividades paralelas desta edición irase dando a coñecer nas redes sociais de Estudios Abertos e na páxina web www.coruna.gal/estudiosabertos.