A concelleira de Benestar Social, Participación e Igualdade, Nereida Canosa, participou hoxe no acto polo décimo aniversario do centro de día Acouga, xestionado por Accem, onde reafirmou o compromiso do Concello coa inclusión social e co apoio continuado a iniciativas que acompañan ás persoas sen fogar, así como co traballo en rede con entidades que atenden á poboación máis vulnerable.

"Traballar en rede é máis ca unha estratexia: é unha necesidade. E podemos dicir con orgullo que, na nosa cidade, esta colaboración é xa unha realidade consolidada. En materia de senfogarismo, o Equipo Municipal de Inclusión Social (EMIS) coordínase estreitamente con Acouga e co conxunto de entidades sociais da cidade, tecendo unha rede de recursos que inclúe centros de baixa esixencia, albergues, centros sociais de atención continuada ou servizos de intervención en rúa. Un modelo que é exemplo de como o traballo en rede permite dar respostas integradas e adaptadas a unha realidade social en constante transformación", indicou Canosa.