O Goberno local homenaxea o vindeiro martes día 23 á primeira corporación do período democrático, que cumpre 40 anos dende a súa constitución. O alcalde, Xulio Ferreiro, presidirá un acto no Salón de Plenos do Pazo de María Pita para render homenaxe ás persoas que formaron parte deste Goberno local, que estivo encabezado polo alcalde Domingos Merino. A celebración complétase cunha xornada de portas abertas na que a cidadanía está convidada a visitar o Pazo de María Pita para coñecelo máis de preto a través de visitas guiadas.

As portas abriranse ás 11.00 horas e ata as 21.00 horas. As persoas que se acheguen poderán percorrer as salas do Pazo para coñecer e achegarse as obras artísticas que se conservan no edificio e tamén as funcións de cada sala. Dúas persoas guiarán os percorridos, en grupos de un máximo de 20 persoas, que iniciarán os paseos polo edificio cada media hora. Estas visitas guiadas pararanse entre as 12.50 e as 14.00 horas para a celebración do acto oficial de homenaxe no Salón de Plenos, no que se lembrará aos concelleiros e ás concelleiras que tomaron posesión das súas actas o 19 de abril de 1979 para conformar a primeira corporación tras do restablecemento da democracia no Estado.