O salón de actos da Fundación ONCE acolleu hoxe a Xornada Formativa "Menores vítimas de violencia de xénero e violencia vicaria" , organizada polo Concello da Coruña no marco da campaña municipal do 25N. A sesión, que esgotou prazas, reuniu a profesionais dos ámbitos social, educativo, sanitario, policial e xurídico, así como alumnado universitario de ciencias sociais e da saúde.

Na apertura institucional, a concelleira de Benestar Social, Participación e Igualdade, Nereida Canosa, alertou do avance dos discursos negacionistas sobre a violencia de xénero e reivindicou a necesidade de reforzar a prevención e a protección das vítimas. Insistiu en que "o negacionismo non é unha opinión máis, senón un perigo para a seguridade das mulleres e das crianzas", e salientou que a violencia vicaria "constitúe unha das expresións máis cruéis de maltrato, pois emprega ás fillas e fillos para prolongar o dano".

O achegamento experto: psicoloxía, saúde infantil e abordaxe xudicial

A xornada contou coa participación de tres referentes que ofreceron unha análise interdisciplinar do fenómeno:

• Sonia Vaccaro, psicóloga e pioneira na definición de violencia vicaria, explicou as bases psicolóxicas deste tipo de violencia e os patróns de comportamento dos agresores, incidindo na necesidade de dotar aos profesionais de ferramentas para a súa detección temperá.
• Lola Aguilar, pediatra experta en saúde infantil en contextos de violencia, detallou os efectos que a violencia machista produce nos menores, mesmo desde a etapa prenatal -alteracións do desenvolvemento, impacto emocional, somatizacións e aumento do risco vital-.
• Cira García, maxistrada especializada en violencia contra a muller, expuxo os desafíos xudiciais no tratamento destes casos e a importancia de garantir procedementos que coloquen no centro o interese superior das crianzas.

As tres poñentes puxeron especial énfase nos avances introducidos pola Lei Orgánica de Protección Integral á Infancia e a Adolescencia fronte á Violencia (LOPIVI), destacando que esta normativa supón un salto cualitativo ao recoñecer ás crianzas como vítimas directas da violencia vicaria e da violencia de xénero, reforzar os protocolos de coordinación e incrementar as esixencias de protección institucional.

Un auditorio completo e multidisciplinar

A participación superou as expectativas, con aforo completo e presenza de profesionais dos servizos sociais municipais, unidades policiais especializadas, persoal sanitario, profesorado, entidades sociais, equipos de atención á infancia e alumnado universitario, reflectindo a necesidade de abordaxes transversais e coordinadas.

Unha actividade integrada na programación municipal do 25N

A xornada insírese na programación do 25N presentada esta semana pola alcaldesa Inés Rey xunto coa concelleira Nereida Canosa, unha campaña que dedica un dos seus eixos á violencia exercida contra as e os menores e, de forma específica, á violencia vicaria. Na presentación institucional, a rexedora puxo o foco nesta como unha das formas máis extremas da violencia machista e destacou a necesidade de reforzar os recursos de atención ás vítimas. Alertou tamén do perigo dos discursos negacionistas, especialmente entre a mocidade, por contribuíren a invisibilizar a violencia específica que sofren as mulleres e as crianzas polo feito de selo.

O programa municipal inclúe accións formativas, contidos educativos, teatro, obradoiros infantís, espazos comunitarios e actividades culturais en diferentes equipamentos municipais, sempre baixo o lema "Non hai escusas".