Nas vindeiras semanas, o Concello dará un paso máis no seu plan de continuidade para renovar a rede de saneamento municipal. Será nos barrios do Castrillón e Elviña, onde se actuará ao longo das rúas Fariña Ferreño e Alexander Von Humboldt, respectivamente.

A concelleira de Infraestruturas e Mobilidade, Noemí Díaz, contextualizou estas dúas actuacións, que forman parte da programación anual que o Goberno de Inés Rey está a desenvolver en todos os distritos da cidade co obxectivo de modernizar o sistema de recollida e separación de augas.

"Vimos actuando en puntos como a Agra do Orzán, Monte Alto e Os Mallos para substituír as antigas tubaxes de gres e instalar colectores novos, de PVC, amplos e moito máis resistentes e seguros", explicou. Isto dá máis garantías de prevención fronte a hipotéticos episodios de fugas na rede.

Este plantexamento é o que seguirá precisamente en Fariña Ferreño e Alexander Von Humboldt, por ser dúas rúas onde as infraestruturas de saneamento son de materiais máis antigos -ben de gres ou formigón- e, polo tanto, precisan dunha actualización.

As intervencións arrincaron a inicios desta semana en Alexander Von Humboldt, con traballos que continuarán ao longo de dous meses. No caso de Fariña Ferreño, actuarase no treito comprendido entre a avenida da Concordia e José María Hernansáez, coa previsión de que as obras se executen tamén en dous meses, aproximadamente.

O investimento conxunto nestas melloras no Castrillón e Elviña será de 100.000 euros.